दलाल सरकार खारेज गरौँ’ भन्दै विप्लव समूहले कैलालीका अधिकांश वडामा लगायो ताल्चा

असार २२, कैलाली ।

कैलालीका प्रायजसो वडा कार्यालयमा तालाबन्दी गरिएको छ । नेत्रविक्रम चन्द विप्लव नेतृत्वको नेपाल कम्युनिष्ट पार्टीले कैलालीका धेरैजसो वडा कार्यालयहरुमा तालाबन्दी गरेको हो ।

धनगढी उप–महानगरपालिका क्षेत्रका १४ वटा वडा कार्यालयमा तालाबन्दी गरिएको विप्लव समूहका एक नेताले बताए । तालाबन्दी गर्दै वडा कार्यालयमा नेपाल कम्युनिष्ट पार्टी सेती–महाकाली ब्यूरोको पर्चा समेत राखिएको छ ।

त्यस्तै टीकापुर नगरपालिका, लम्कीचुहा नगरपालिका, भजनी नगरपालिका, घोडाघोडी नगरपालिकाका वडा कार्यालयहरु समेत तलाबन्दी गरिएको छ । तालाबन्दी गर्ने क्रममा जानकी गाउँपालिका र जोशीपुर गाउँपालिकाका वडा कार्यालयहरुमा समेत विप्लवका कार्यकर्ताहरुले तालाबन्दी गरेका छन् ।

वर्तमान सरकार राष्ट्रघाती, जनविरोधी र भ्रष्टाचार तर्फ उल्मुख भएको भन्दै त्यसका विरुद्ध पार्टीले सुरु गरेको अभियान अन्तरगत तालाबन्दी गरिएको पर्चामा उल्लेख गरिएको छ । ‘पर्चामा सामाजिक दलाल पुँजीपति सरकार खारेज गरौँ’ लगायत नारा अंकित छन् ।

यसअघि विप्लवका कार्यकर्ताले गएराती कैलालीको लम्कीचुहा नगरपालिकामा कार्यालयमै भेटिएका कर्मचारी र जनप्रतिनिधिलाई थुनेका थिए ।

साढे आठ बजे रातीसम्म कार्यालयमै काम गरिरहेको अवस्थामा भेटिएका दुई जना कर्मचारी र जनप्रतिनिधीलाई विप्लव समूहले बाहिरबाट ताला लगाएर थुनेको थिए । नगरपालिकाका लेखापाल सरोज चौधरी र कार्यालय सहयोगी बगेन्द्र सुनार सहित केही जनप्रतिनिधी रातीको समयमा लेखा फाँटमा काम गरिरहेको भेटाएपछि उनिहरुलाई बाहिरबाट ताला लगाएर थुनेको एक नेताले बताए ।

उता गोदावरी नगरपालिकाको वडा नम्बर ७ र ८ को वडा कार्यालय परिसरमा शंकास्पद बस्तु समेत फेला परेको जिल्ला प्रहरी कार्यालय कैलालीका प्रबक्ता प्रहरी नायब उपरिक्षक दक्ष कुमार बस्नेतले जानकारी दिए । उनले उक्त बस्तुबारे नेपाली सेनालाई जानकारी गराईसकेको बताए ।