मन्दिरको जग्गामा निर्माण गरिएका आधा दर्जन घर टहरा भत्काइयो

जनकपुर ।

गुठी संस्थान जनकपुरका नयाँ प्रमुख गुठीको जग्गा अतिक्रमण गरी बनाइएका घर टहरा तोड्ने अभियानमा लागिपरेका छन् ।गुठी संस्थान जनकपुरका पूर्व निमित्त प्रमुख मनोज शर्मामाथि अख्तियार दुरुपयोग अनुसन्धान आयोगले जालसाजी तथा ठगी अभियोग लगाएपछि निलिम्बित छन् । उनी निलिम्बित परेको करिब एक महिना पछि गुठी संस्थान जनकपुरको प्रमुखमा वैकुण्ठ रेग्मी आएका छन् । उनी कार्यालयमा आएसँगै गुठी तथा मठ– मन्दिरको अतिक्रमित जग्गा मुक्त गराउन अग्रसर देखिएका छन् ।

जनकपुरधाम वडा नम्बर १२ स्थित हनुमाननगरमा रहेको हनुमान मन्दिरको अधिनमा रहेको जग्गामा सैयौँ घर टहरा निर्माण गरी वर्षौंदेखि परिवारहरु बसोबास गर्दै आएका छन् । मन्दिरका पुजारी किशोरी शरणले गुठी संस्थान जनकपुरमा निवेदन दिँदै घर टहरा तोडी धार्मिक जग्गा अतिक्रमण मुक्त गरिदिन आग्रह गरेपछि गुठी संस्थान जनकपुरले एक्सन लिएको हो । १५ दिने मिथिला मध्यमा परिक्रमाको क्रममा डोला लिएर हनुमाननगरमा श्रद्धालु भक्तजनहरु एक रात विश्राम गर्ने गर्दछन् । । सो जग्गा नै अतिक्रमण हुन थालेपछि हनुमानका पुजारीसहित केहि स्थानीयवासीले ३ वर्षदेखि घर निर्माण गरी बसोबास गर्दै आएका ८ जनाको घर टहरा तोड्नका लागि निवेदन दिएका थिए । सोहि अनुसार शनिबार गुठी संस्थान जनकपुरका प्रमुख रेग्मी, प्रहरी र मन्दिरका पुजारीको सहयोगमा ८ वटा मध्ये ६ वटा घर टहरा तोडिएको छ । दिनेस दास, भिलवा दास, उदय दास, बेचन यादव, विल्टु यादव, राम दयाल दास लगायतका घर टहरा तोडिएका छन् ।

गुठी संस्थान जनकपुरका प्रमुख वैकुण्ठ रेग्मीले हनुमान मन्दिरका पुजारी किशोरी शरणले दिएको निवेदन अनुसार अतिक्रमित जग्गा खाली गराउनका लागि डोजर लगाएर तोडिएको बताए । उनले गुठीका जग्गा अतिक्रमण गरी बनाइएका अधिकांश घर टहराहरु छिट्टै नै तोडिने उद्घोषसमेत गरे ।

त्यस्तै, हनुमान मन्दिरका सहयाक पुजारी प्रवोध दास वैष्णवले धार्मिक जग्गाहरु अतिक्रमण हुन थालेपछि आफुहरुलाई सह्य नभएकाले गुठीमा निवेदन दिइ जग्गा मुक्त गराइदिन भनेपछि गुठीले घर टहरा तोडेको बताए । उनले यस कदमलाई स्थानीयवासीले समेत सकारात्मक रुपमा लिएको पनि जिकिर गरे ।

समाचार रातोपाटिमा छ ।