देवचुली ।
पूर्बि नवलपरासीको पहाडी क्षेत्रमा चल्ने सवारीमा जोखिमपूर्ण यात्रा नरोकिएपछि जिल्ला ट्राफिक प्रहरी कार्यालय नवलपुरले हुट (क्यारियर) हटाउन थालेको छ । जिल्लामा अनाधिकृत रुपमा सवारीसाधनमा जडान गरिएका हुट (क्यारियर) प्रहरीको सकृयतामा हटाउन थालिएको हो । यात्रुसहित बढी भारयुक्त सामान बोक्दा सवारी दुर्घटना हुनसक्ने भन्दै नवलपुर ट्राफिक प्रहरीले सामान राख्ने हुट नै हटाएको हो । सवारी तथा यातायात व्यवस्था नियमावली, २०५४ को मापदण्ड मिचेर बस, जिप, पिकअप लगायतका सवारीमा जडित हुट हटाउन लागेको हो ।ट्राफिक कार्यालय नवलपुरका अनुसार हाल सम्म ७ वटा पिकअप भ्यानका हुट हटाएको छ । पटक – पटक हुटमा यात्रु नराख्न अनुरोध गर्दा समेत यात्रु राख्न नछाडेपछि सवारीको हुट्नै हटाईएको जिल्ला ट्राफिक प्रहरी कार्यालय नवलपुरका प्रमुख मुनेन्द्ध थापाले बताएका छन् ।
जिल्लाको पहाडी क्षेत्रमा चल्ने सबै सवारीको हुट हटाईने ट्राफिक प्रमुख थापाले बताए । बस व्यवसायी समिति, जिप व्यवसायी समितिलाई परिपत्र गरेर मापदण्ड कायम राख्न भनेपनि व्यवसायीले अटेरी गरेपछि ट्राफिकले नै हुट हटाउन सुरु गरेको हो । केही यात्रु बोक्ने जिपका हुट हटाइएको र केही दिनभित्र सबै हटाइसक्ने जिल्ला ट्राफिक प्रहरी प्रमुख मुनेन्द्ध थापाले बताए ।
तर पनि जिल्लाको डेढगाँउ , बुलिङटार , हुप्सेकोट गाँउपालिकाको पहाडी क्षेत्र , मध्यबिन्दु नगरपालीकाको पहाडी क्षेत्र र बिनयीत्रिबेणी गाँउपालीकाको पहाडी क्षेत्रमा चल्ने सवारीहरुले अनुमति भन्दा अधिक यात्रुलाई जोखिम पुर्ण यात्रा गराउदै आएका छन् ।