राजु चापागाई
१६-पौष,हुप्सिकोट।
हुप्सिकोट गाउँपालिका -५ स्थित त्रिभुवन आधारभुत विद्यालयका विद्यार्थीहरुलाई न्यानो कपडा प्रदान गरिएको छ । युवा अभियन्ताहरुले सामाजिक संजाल फेसबुकद्वारा विभिन्न व्यक्तिहरुको सहयोगमा न्यानो कपडा प्रदान गरिएको हो ।न्यानो अभियान अन्तर्गत केही दिन अघि देवचुली १६ बाह्रकोलका ८५ जना विद्यार्थीहरुलाई न्यानो कपडा वितरण गरिएको र आज कक्षा ५ सम्म पढाइ हुने हुप्सिकोट -५ पांग्रेको त्रिभुवन आधारभुत विद्यालयमा कक्षा ५ सम्मका ५५ जना विद्यार्थीहरुलाई एक विद्यार्थी एक स्वीटर र टोपी माया उपहार स्वरूप प्रदान गरिएको युवा अभियन्ता दीपक शर्माले जानकारी दिए ।
नवलपुरको करिब १०० जना विद्यार्थीहरुलाई न्यानो कपडा वितरण गर्ने लक्ष्य राखी सुरु गरिएको अभियानमा विभिन्न व्यक्तिहरुको सहयोगले दुई विद्यालयका १४० जना विद्यार्थीहरुलाई न्यानो कपडा उपहार प्रदान गर्न सकेको अभियन्ता राजु चापागाईंले बताए । युवा अभियन्ता विश्वास लामिछानेले जाडोमा न्यानो कपडाको अभावले विद्यालय आउनै अप्ठ्यारो साथै पठनपाठनमा प्रभाव परेकोले सामाजिक संजालमा हरेक वर्ष न्यानो अभियान संचालन गर्दै नवलपुरको पहाडी गाउँका बालबालिकाहरुलाई न्यानो कपडा प्रदान गरिरहेको बताउँदै यस वर्ष पनि अभियान संचालन गरिएको र सो अभियानमा सहयोग गर्ने सम्पुर्णलाई धन्यवाद व्यक्त गरे ।
विद्यालय व्यवस्थापन समितिका अध्यक्ष नेत्र बहादुर सिंजालीको अध्यक्षता भएको कार्यक्रममा विद्यालयका प्रधानाध्यापक बसन्ती न्यौपाने, युवा अभियान्ताहरु , पत्रकार , अभिभावकहरुको उपस्थिती रहेको थियो ।न्यानो अभियान युवा अभियन्ताहरु राजु चापागाई, दिपक शर्मा, विश्वास लामिछाने , दिपक न्यौपाने , विजय सारु र होमनाथ पौडेलले संचालन गरेका थिए ।
