चिकित्सकको लापारबाहीले सुत्केरीको मृत्यु भएको भन्दै एनएमसी घेराउ

काठमाडौं ।

प्रसूति गराउने क्रममा सुत्केरीको मृत्यु भएपछि मृतकका आफन्तहरूले काठमाडौँको जोरपाटीमा रहेको नेपाल मेडिकल कलेज घेराउ गरेका छन्।

भोजपुरको षडानन्द नगरपालिका वडा न. ८ कि २४ वर्षीया सुनमायाँ राई (सुनिता) को प्रसूति गराउने क्रममा निधन भएपछि उनका आफन्तहरूले चिकित्सकको लापारबाहीका कारण मृत्यु भएको भन्दै मेडिकल कलेज घेराउ गरेका हुन्।

सुनिताको गत बिहीबार राति करिब ११ बजे निधन भएको थियो। प्रसूतिका लागि सोही दिन उनी भर्ना भएकी थिइन्।

मृतकका आफन्तहरूले प्रसूति गराउन संलग्न चिकित्सकलाई कारबाहीको माग गरेका छन्।

यससँगै सुनिताले जन्म दिएकी शिशु (छोरी) को लालनपालनको व्यवस्था मिलाई दिन पनि मेडिकल कलेज प्रशासनसँग माग गरिएको मृतककी श्रीमान जीतबहादुर राईले बताए।