काठमाडौं ।
मकवानपुरको दामनस्थित पानोरोमा रिसोर्टमा बेहोस भएर मृत्यु भएका आठजना भारतीय एकै परिवारका सदस्य भएको खुलेको छ । कोठामा हिटर बाली सुतेको अवस्थामा बेहोस भएका उनीहरुलाई कैलाश एयरको हेलिकप्टरबाट काठमाडौंस्थित हेम्स अस्पताल ल्याइएको थियो ।
प्रहरी प्रवक्ता डीआईजी शैलेश थापा क्षेत्रीले ज्यान गुमाउने सबै एकै कोठामा सुतेको र निसास्सिएर ज्यान गएको प्रारम्भिक अनुसन्धानबाट खुलेको बताए । उनका अनुसार उनीहरु १५ जना भारतबाट आएका थिए । जसमध्ये ८ जना एकै परिवारका थिए । डीआईजी क्षेत्रीका अनुसार उनीहरु सबै एकै कोठामा सुतेका थिए ।
मृत्यु हुनेमा भारत केरलाका ३८ वर्षीय रन्जित कप, ३४ वर्षीय इन्द्र, ३७ वर्षीय प्रविण, ३२ वर्षीया सरिया, ५ वर्षीय अभी, ७ वर्षीया अर्चना,५ वर्षीय बैशनव र ९ वर्षीया बद्रा कप छन् ।
