देशभरका विद्यालयमा सरस्वती पूजाको दिन भर्ना अभियान, देवचुलीको जनज्योतीमा विशेष कार्यक्रम

भिम भुसाल, देवचुली ।  
प्रत्येक वर्ष माघ शुक्ल पञ्चमीका दिन मनाइने श्रीपञ्चमी विद्याकी देवी सरस्वतीको बिहिवार विभिन्न कार्यक्रम गरी धुमधामका साथ मनाइएको छ । विद्याकी देवीका रूपमा मानिने सरस्वतीको आराधना गर्दै देशभरका विभिन्न विद्यालयहरुमा सरस्वती पूजा गरिएको हो । हिन्दु धर्मावलम्बीहरुले सरस्वती मन्दिर तथा पुस्तकको आराधना गरी श्रद्धा पुर्वक पुजा गरेका छन् ।
देशभरका विभिन्न विद्यालयहरुमा आजको दिन अक्षर शुभारम्भ गरि भर्ना अभियान सञ्चालन गरिएको छ । यसै क्रममा देवचुलीको जनज्योती माध्यमिक विद्यालयको प्राईमरी ब्लकले विशेष कार्यक्रको आयोजना गरि भर्ना अभियान शुभारम्भ गरेको छ । प्राईमरी ब्लक विद्यालय ब्यवस्थापन समिति संयोजक प्रितम भुजेलको अध्यक्षता तथा नवप्रतिभा बचत तथा ऋण सहकारी संस्था लिमिटेडका कार्यकारी निर्देशक रामप्रसाद काफ्लेको प्रमुख आतिथ्यतामा भर्ना अभियान शुभारम्भ गरिएको हो ।

विशेषगरी सरस्वती पूजाको दिन बालबालिकालाई अक्षराम्भ गराए शुभ हुने मानिन्छ । विद्यार्थीहरु देवी सरस्वतीको पूजा प्रार्थना गर्न बिहानै देखि देवचुली १५ प्रगतिनगरमा रहेको जनज्योति माध्यमिक विद्यालय प्राईमरि ब्लक भएको स्थानमा भीड रहेको थियो । विद्यालयको शैक्षिक गुणस्तर तथा भौतिक संरचनाको स्तरउन्नती गर्न सहयोग गर्ने विभिन्न सहयोगी ब्यक्ति तथा संघ–संस्थाहरुलाई विद्यालयले विशेष कार्यक्रम राख्दै सम्मान समेत गरेको छ ।
विद्यालयको शैक्षिक गुणस्तर वृद्धिगर्न सिसि क्यामेरा, प्रोजेक्टरको माध्यमबाट पठनपाठन, आधुनिक खेलकुद सामाग्रीका साथ विद्यार्थिहरुलाई दिवा खाजाको ब्यवस्था समेत विद्यालयमा हुने ब्यवस्था गरिएको छ । १ सय ३० विद्यार्थि रहेको जनज्योति प्राईमरी ब्लकमा आज मात्रै २० विद्यार्थि भर्ना भएका छन् ।

हरेक विद्यालयहरुले आ–आफनै तरिकाले आज बसन्त पञ्चमी मनाएका छन् । आजको दिन विद्यार्थी, शिक्षक, साहित्यकार, कलाकार, पत्रकारहरुले आ–आफ्ना कलासाधनाका उपादानहरु कापी–कलम, वाद्ययन्त्र, कुचीलगायतको श्रद्धापूर्वक पूजा गर्ने गर्दछन ।