नवलपुर ।
पूर्वी नवलपरासीको दुम्किबासदेखि भेडाबारीसम्म लाग्ने साप्ताहिक हाटबजार बन्द गर्ने तयारी गरिएको छ । १ सय ५० भन्दा बढी देशमा फैलिएको कोरोना भाइरस (कोभिड–१९) को संक्रमण फैलिन सक्ने भन्दै सरकारले मानिसहरु बढी जम्मा हुने गरी कार्यक्रम, भोजभतेर, पूजाआजा नगर्न आग्रह गरेको थियो ।
सरकारको निर्देशनअनुसार विभिन्न कार्यक्रमहरु स्थगित गरिएका छन् । मानिसहरुको बढी भिड जम्मा हुने जस्ता ठाउँहरुमा केही समय बन्द गरी संक्रमणबाट जोगिन सकिने विश्वास लिइएको छ । हाटबजार लाग्ने ठाउँमा मानिसहरुको भिँड बढी जम्मा हुने भएकाले जोखिम बढी भएको स्थानीय प्रशासनको भनाइ छ ।
बुधबार नवलपरासी (बर्दघाट सुस्तापूर्व)का प्रमुख जिल्ला अधिकारी पिताम्बर घिमिरेको उपस्थितिमा जिल्लाका विभिन्न सरकारी अधिकारीको बैठकमा यसबारे निर्णय गरिने बताइएको छ । स्रोतकाअनुसार आगामी बैशाख १८ गतेसम्म हाटबजार बन्द गर्ने प्रस्ताव गरिँदैछ ।
उक्त बैठकमा हाटबजार बन्द गर्नेबारे आफूहरुले प्रस्ताव राख्ने जिल्ला स्वास्थ्य कार्यालयका प्रमुख केशव चापागाईँले बताए । हाटबजार ब्यवस्थापन समितिले भने यसबारेमा निर्णय भइनसकेको बताएको छ । हाटबजार मात्रै होइन, अन्य बजार क्षेत्र पनि उत्तिकै भिँडभाड हुने भएकाले सबै बजार क्षेत्र बन्द गरिनुपर्ने हाटबजार ब्यवसायीहरुको भनाइ छ । कोरोनाको त्रास रहेको भन्दै अत्याधिक भिड हुने ठाउँहरुमा नजान स्थानीय प्रशासनले आग्रह गरेपनि हाटबजार लगायत भिडजन्य ठाउँहरुमा भिड कम भएको छैन ।
हाटबजार बन्द हुने चर्चा चलेसँगै उपभोक्ताले दैनिक उपभोग्य वस्तुको जोहो गर्न थालेका छन् । बजार बन्द हुँदा महंगी बढ्ने र दैनिक उपभोग्य वस्तुको हाहाकार हुने भन्दै नुन, तेल, चिनी लगायतका सामग्री उपभोक्ताले आवश्यकता भन्दा बढी लगेको कावासोतीका एक ब्यापारीले बताए ।
