भिम भुसाल, देवचुली ।
नवलपुरको देवचुली नगरपालिकाले सरकारले जारी गरेको लकडाउन प्रभावकारी बनाउन खाद्यान्न, तरकारी तथा फलफुल पसल दिउसो ४ घण्टा मात्रै खोल्न निर्देशन गरेको छ । आज बिहिवार विपत ब्यवस्थापन समितिको देवचुली नगरपालिका सभाहलमा आकस्मिक बैठक बस्दै लकडाउनको समयमा ब्यक्तिहरुको भिडभाड भएकोले दिउसो १२ देखि ४ बजे सम्म मात्रै खोल्न निर्देशन गरको हो ।
साथै नगरभित्र रहेको ईलाका प्रहरी कार्यालय रजहर, औधोगिक सशस्त्र प्रहरी बल देवचुली र अस्थाई प्रहरी पोष्ट दलदलेलाई आवश्यक सवारीसाधन, सुरक्षका सामाग्री उपलब्ध गराउदै नगरभित्र लकडाउन तोड्ने सवारी साधन नियन्त्रणमा लिन आग्रह गरेको छ । सोहि अनुरुप प्रहरीले आज साँझ देखि नै जथाभावी सञ्चालन गरेका मोटरसाईकल, अटो, टेक्टर लगाएतलाई नियन्त्रणमा लिन शुरु गरेको छ ।
विपत ब्यवस्थापन समितिको निर्णय अनुरुप नै क्वारेन्टाईमा रहेका ब्यक्तिलाई भोजन सहितको आवासको सुविद्या, सामुदायिक प्राकृतिक चिकित्सालयमा क्वारेन्टाईनको सुविद्या, मदिरा पसल, होटल रेष्टुरा पूर्णरुपमा बन्द गर्ने र अनुगमनलाई तिव्रता दिने निर्णय गरेको छ ।
त्यस्तै निजि स्वास्थ्य संस्थालाई कोरोना संक्रमण ब्यवस्थापनमा सहयोग गर्न अनुरोध, नगरबाट सुचनाको प्रभावकारीता, नगरभित्र सञ्चालित एम्बुलेन्स चालकलाई पिपिई सहितको सुरक्षा सामाग्री उपलब्ध गराउने तथा सम्पुर्ण नगरबासीमा नेपाल सरकारको आधिकारीक सुचनालाई पढ्न र घरमै बसेर लकडाउनलाई सफल बनाउन नगरपालिकाले अनुरोध गरेको छ ।
