नवलपुरमा अलपत्र परेका एक हजार बढी श्रमिकलाई उद्धार गर्दै जिल्ला प्रशासन

भिम भुसाल, नवलपुर ।
नवलपरासी वर्दघाट सुस्ता पूर्व (नवलपुर) जिल्ला प्रशासनले लकडाउनको समयमा जिल्लामा अलपत्र परेका श्रमिकलाई उद्धार गर्ने भएको छ । कामको शिलशिलामा नवलपुर आएका र गृह जिल्ला जान चाहाने श्रमिकलाइ निमार्ण ब्यवसायी ठेकेदारले सवारीसाधनको ब्यवस्था गर्ने र जिल्ला प्रशासन कर्यालयले सवारी पासको ब्यवस्था गर्ने गरि उद्धार गर्न लागिएको हो ।
बारा, पर्सा, सल्यान, कैलाली, झापा लगाएतका जिल्लाबाट नवलपुर काम गर्न आएका श्रमिक पैदल हिडेर आफ्नो गृह जिल्ला जान लागेपछी नवलपुर प्रशासनले भोली आईतवार श्रमिकको उद्धार गर्ने प्रमुख जिल्ला अधिकारी पिताम्बर घिमिरेले जानकारी दिनुभयो । करिव २ सय ५० जना श्रमिक जिल्ला छोडेर गैसकेको जनाउदै बाँकी रहेका करिव एक हजार देखि १२ सय श्रमिकलाई उनिहरुको सम्बन्धित जिल्ला प्रशासनसँग समन्वय गरि पठाउन लागिएको घिमिरेले बताउनुभयो ।
नवलपुरको काली गण्डकी करिडोर, हेटौडा–बर्दघाट प्रशारण लाईन, नारायगढ बुटवल सडक निमार्ण लगाएतका आयोजनामा काम गर्दै आएका दैनिक ज्याला मजदुरी गरेर खाने श्रमिकलाई उनिहरुको चाहाना अनुरुप गृह जिल्ला पठाउन लागिएको हो ।
उनिहरुलाई नवलपुर जिल्लाबाट पठाईसकेपछी पनि १४ दिन उनिहरुकै जिल्लामा क्वारेन्टाइनमा राखिने ब्यवस्था मिलाईएको छ ।