दयाराम आचार्य,नवलपुर ।
राज्य सङ्कटमा परेका बेला बन्द रहेका निजि मेडिकलको नविकरण रोक्ने तयारी थालिएको छ । न्यूनतम स्वास्थ्य उपचार समेत नागरिकले सहज रुपमा पाउन नसकेको गुनासो बढदै गएपछि स्थानीय तहहरू निजि मेडिकल प्रति कठोर हुन लागेका हुन् । नवलुरमा रहेका निजि मेडिकलहरू अहिले अधिकांश बन्द अवस्थामा रहेका छन् ।
लाभ लिने समयमा प्रतिस्पर्धा गर्ने तर आम नागरिक सङ्कटमा पर्दा न्यूनतम स्वास्थ्य सेवा समेत उपलब्ध नगराई बन्द गरेका निजि मेडिकलको नविकरण रोकिने कावासोती नगरपालिका उप प्रमुख प्रेमशङ्कर मर्दनिया थारुले बताउनु भएको छ । पहिला जानकारी गराउने,जानकारी गराउदा समेत अटेर गरी मेडिकल नखोलेमा नविकरण रोक्ने तयारी गरिएको उहा“ले बताउनु भएको छ । आम नागरिकले समेत निजि मेडिकल देखाएको व्यवहार प्रति आक्रोश व्यक्त गरेका छन् ।
अहिले राज्य सङ्कटमा छ, राज्य र आम नागरिक समेत भाइरस बिरुद्ध लडिरहदा निजि मेडिकलहरू भने बन्द गरेर बस्नु निन्दनीय कार्य भएको कावासोती तीनका स्थानीय गोपाल लामिछानेले बताउनुभयो ।
देवचुली नगरपालिकाका प्रमुख प्रशासकीय अधिकृत विष्णु प्रसाद भुषालले समेत अहिलेको अवस्थामा बन्द रहेका निजि मेडिकल प्रति उदार बन्न नसकिने बताउनु भएको छ । अहिले राज्य र नागरिकलाई सेवा प्रदान गर्नु पर्ने बेलामा बन्द गरिनु उचित नभएको भन्दै, त्यस्ता मेडिकलको रेकर्ड राखि नविकरण रोक्न सकिने प्रमुख प्रशासकीय अधिकृत भुषालले बताउनुभयो ।
गैण्डाकोट नगरपालिकाका प्रमुख छत्रराज पौडेलले समेत स्वास्थ्य जस्तो संवेदनशील क्षेत्रमा सेवा प्रदान गर्ने संस्थाहरू अहिलेको बिषम परिस्थितिमा बन्द हुनु उचित नभएको भन्दै, बन्द गरे आफूहरुले समेत नविकरण रोकि त्यस्ता मेडिकललाई बन्द गराउने बताउनु भएको छ ।
अहिले सामान्य ज्वरो,रुखा,खोकी देखी अन्य स्वास्थ्य समस्या देखिए पनि सहज रुपमा उपचार नपाउने अवस्था सिर्जना भएको छ । जिल्लाका सरकारी स्वास्थ्य सेवाहरू खुल्ला रहेपनि निजि मेडिकलहरू भने बन्द अवस्थामा रहेका छन् ।