देवचुलीको खाद्यान्न बैङ्कमा ६ लाख ८२ हजार संकलन, आज मात्रै २ लाख ६५ हजार सहयोग प्राप्त

भिम भुसाल, देवचुली ।

कोरोना भाईरसको रोकथाम तथा नियन्त्रणको लागि देवचुली नगरपालिकाले जनस्तरबाट शुरु गरेको खाद्यान्न बैङ्कमा ६ लाख ८२ हजार रुपैया बरावरको नगद तथा खाद्यान्न संकलन भएको छ । सरकारले लकडाउन शुरु गरेसँगै देवचुली नगरपालिकाले दैनिक ज्याला मजदुरी गर्ने विपन्न परिवार तथा श्रमिकलाई राहत स्वरुप निमार्ण गरेको खाद्यान्न बैङ्कमा उक्त रकम जनस्तरबाट संकलन भएको हो ।
नवलपुर भित्रका १८ वडा संघसंस्था तथा सहयोगी ब्यक्तिहरले देवचुलीको खाद्यान्न बैङ्कमा सहयोग हस्तान्त्रण गरेका छन् । जसमा ४ लाख ४८ हजार पाँच सय पाँच रुपैया नगद र २ लाख ३३ हजार पाँच सय पाँच रुपैया बरावरको खाधान्नमा सहयोग प्राप्त भएको छ । ६ दिनको अवधिमा संकलित रकममा आज मात्रै २ लाख ६५ हजार रुपैया बरावरको सहयोग खाद्यान्न बैङ्कमामा जम्मा भएको देवचुली नगरपालिकाले जानकारी गराएको छ ।

आफूँले नै आफ्नोलागी सहयोग गरौँ भन्ने उदेश्यका साथ जनस्तरबाट नै सहयोग रकम संकलन गरि नगरभित्रका अति विपन्न एंव दैनिक ज्याला मजदुरी गरेर जिवन निर्वाह गर्दै आएका नागरिकलाई खाद्यान्न प्रदान गरिने देवचुली नगरपालिका प्रमुख प्रशासकिय अधिकृत विष्णुप्रसाद भुसालले बताउनुभयो ।

नगरपालिकाले एकद्धार प्रणालीमार्फत राहत वितरण गर्ने भएकोले अति विपन्न परिवारले मात्रै राहत प्राप्त गर्ने देवचुली नगरपालिका उपप्रमुख पार्वता तिवारीले बताउनुभयो । साथै वडामा सर्वपक्षिय तथा सर्वदलिय आधारमा, दैनिकि गुजारा चलाउन नसक्ने परिवारलाई मात्रै राहत प्रदान गर्न नगरपालिकाले हरेक वडालाई निर्देशन गरेको उपप्रमुख तिवारीले जानकारी दिनुभयो ।
देवचुली नगरपालिकाले जनस्तरबाट नै निमार्ण गरेको खाद्यान्न बैङ्कले सर्वत्र प्रशंसा पाएको छ ।