प्रधानमन्त्री केपी शर्मा ओलीले आगामी दुई साता नेपालका लागि थप चुनौतीपूर्ण हुने बताएका छन्। मंगलबार देशबासीका नाममा सम्बोधन गर्दै प्रधानमन्त्री ओलीले अबको दुई साता कोरोना भाइरसको संक्रमण पहिचान हुने भएकाले थप चुनौतीपूर्ण हुने बताए।
‘हाम्रो लागि अबको दुई साता थप चुनौतीपूर्ण हुनसक्छ। यो दुई सातामा संक्रमण फैलिने मात्र होइन, समुदायका लागि पनि निकै चुनौतीपूर्ण हुनसक्छ,’ प्रधानमन्त्री ओलीले भने। उनले त्यसैका लागि सरकारले संक्रमण फैलिने सम्भावित ठाउँहरुमा र्यापिड टेस्ट गरिने निर्णय भएको जानकारी दिए। त्यसका लागि जनपरिचालनसमेत गरिसकेको उनले बताए।
उनले नेपाल उच्च जोखिम रहेकाले नै थप ८ दिन लकडाउन गर्न बाध्य भएको बताए। उनले अहिलेलाई कोरोना संक्रमित ९ जनामा मात्रै सीमित भएपनि अगामी दिन नेपालको लागि भयावह स्थिति बन्न सक्ने जानकारी दिए। त्यसको लागि सबैले आ-आफ्नो स्थानबाट सहयोगको भूमिका निर्वाह गर्न उनले आह्वान गरे।
कोरोना भाइरसको नियन्त्रण र रोकथामका लागि ९ हजार १६८ क्वारेन्टाइनको स्थापना गर्नुको साथै ३ हजार २ सय ५९ वटा आइसोलेसन बेडा तयार पारिएको बताए, जसमा ९५ जना उपचाररत रहेको उनले जाकानरी दिए। उनले नेपालमा हालसम्म १ हजार ८९० जनको परीक्षण गरिएको बताए।
उनले विदेशबाट आएकाहरु क्वारेन्टाइनमा नबस्दा चिन्ता लागेको बताए। उनीहरुलाई तत्कालै स्वास्थ्यकर्मीको सम्पर्कमा जान प्रधानमन्त्रीले आग्रह गरे। ‘यसले तपाइँको घरपरिवार र समग्र देशलाई खतरा हुन सक्छ,’ उनले भने।
प्रधानमन्त्री ओलीले भारतीय सीमामा रोकिएका नेपालीहरुलाई यथास्थानमा रहेर सहयोग गर्न आग्रह गरे। यस्तो संकटका बेला सीमा नाका सिल गर्नुपरेकाले सोही स्थानमा रहन आग्रह गरे। उनले क्वारेन्टाइन अवधि समाप्त भएपछि स्वदेश फर्काउने जानकारी दिए।
उनले भारतीय सीमामा २ हजार १४७ जना नेपालीहरु रहेको र उनीहरुलाई भारत सरकारले क्वारेन्टाइनमा राखेको जानकारी दिए। त्यस्तै नेपालमा ७ सय भारतीय नागरिकलाई क्वारेन्टाइनमा राखिएको उनले बताए।
विदेशमा रहेका नेपालीहरुको अवस्था बुझ्न राष्ट्रपति विद्यादेवी भण्डारीले पनि विभिन्न राष्ट्रका राजदूतहरुसँग सम्पर्क गरेको र आफूँ स्वयं पनि टेलिफोनमार्फत् अवस्था बुझिरहेको जानकारी दिए।
उनले यस्तो संकटका बेला नेपालीहरु जहाँ भएपनि त्यही स्थानमा सुरक्षित रहन आग्रह गरे। त्यस्तै स्वास्थ्य सामग्री अभावका बावजुद दिनरात सेवामा खटिरहेका चिकित्सकहरुलाई उनले धन्वाद दिएका छन्।
