३ दिनदेखि भोकै हिडिरहेका ८० यात्रुहरुलाई रजहरका स्थानियको सहयोग

भिम भुसाल, देवचुली ।
चैत ११ गतेदेखि सरकारले लकडाउन घोषणा गरेपछि धेरै मानिस आफू कार्यरत स्थानमै रोकिए । सबैभन्दा धेरै संघीय राजधानी काठमाडौंमा लकडाउनका कारण धेरै मजदुर अलपत्र परे । दैनिक ज्यालादारी गरेर जिविकोपार्जन गरिरहेका मजदुरहरु अहिले खाद्यान्न जोहो गर्न नसक्दा हिडेरै आफ्नो गाउँफर्कन बाध्य भएका छन् । अहिले दिनहुँजसो काठमाडौं र पूर्वदेखि पश्चिमका मानिसहरु हिडेरै आफ्नो गन्तव्यमा जान थालेका छन् । त्यसरी तीन चार दिन लगाएर नवलपुर आइपुग्ने मानिसहरुलाई धेरैजसो भोकै पेटमा भेटिन्छन् । बुधबार विहान करिब ३० जनाको समुहमा विभिन्न स्थानबाट पैदल हिड्दै आएका यात्रुलाई ईलाका प्रहरी कार्यालय रजहरले खाद्यान्नका विभिन्न सवारीमा चढाएर उद्धार गरेको छ । यात्रुहरु सडकमा हिड्नेक्रम नरोकिएपछि रजहर ट्राफिक प्रहरीले यात्रुहरुलाई उद्धार गर्न प्रहरी कार्यालय अगाडी रोकिराखेका थिए । ठूलो संख्यामा यात्रु सडकमा आउनेक्रमब बढ्दै गएपछि देवचुली नगरपालिका रहजरका स्थानियले ईलाका प्रहरी कार्यालय रजहरमा अलपत्र यात्रुलाई खाना बनाउने र खुवाउने अभियानमा जुटे ।
काठमाण्डौ, पोखरा, धादिङ लगाएतका स्थानदेखि पैदल भोक भोकै हिडिरहेका यात्रुलाई नवलपुरको रजहरमा स्थानियले सहयोग जुटाउदै खाना खुवाएका छन् । काठमाण्डौदेखि बाँके हिडेका ४२ जना, कोहलपुर हिडेका २५ जना, बर्दिया हिडेका ८ जना, पोखराबाट बर्दिया हिडेका ५ जनाको समुहलाई रजहर बजार ब्यवस्थापन समिति र रजहरका स्थानियले चामल, तरकारी, नुन, तेल लगाएतका खाद्यान्न उपलब्ध गराउदै खाना खुवाएको रजहर बजार ब्यवस्थापन समितिका अध्यक्ष सन्तोष थापाले बताए ।
काम गराउने ठेकेदारले पारिश्रमिक समेत नदिई अलपत्र छोडिदिदा ३ दिन देखि भोकै पैदल नवलपुर आईपुगेको बर्दिया हिडेका जगदिश पासवानले बताए । उनको समुहमा काम गर्ने ४२ जना साथिहरु रहेको रहेको बताउदै सबै अलपत्र परेको भन्दै उद्धारको लागि अनुरोध गरेका छन् ।
पोखरामा खानेपानी पाईप बिस्तारमा काम गर्दै आएका बर्दियाका भोजलाल चौधरी समेत ३ दिन देखि भोको पेट नवलपुर आईपुगेका छन् । उनि भन्छन्, “रोग भन्दा भोक सहन गाह्रो भो।”
स्थानियले भोकै रहेका यात्रुलाई खाना खुवाईसकेपछी ईलाका प्रहरी कार्यालय रजहरले खाद्यान्न बोक्ने सवारीमा थोरै–थोरै गरेर यात्रुहरुको उद्धार गर्ने जनाएको छ ।