हरि अधिकारी, विराटनगर ।
मोरङका विभिन्न तीन स्थानमा १९ विदेशी नागरिकसहित ३१ जना मस्जिदमा बसेको पाइएको छ । सुनबर्सी र धनपालथान गाउँपालिकाका र सिक्टी रहेको मस्जिदमा ३१ जनाले आश्रय लिइरहेको पाइएको हो । प्रहरीका अनुसार धार्मिक गतिविधिका लागि आएर मस्जिदमा बस्नेमध्ये ९ पाकिस्तानी, १० भारतीय छन् । सिक्टीमा रहेको मस्जिदमा भने सुनसरीका १२ नेपाली बसिरहेका छन् ।
जिल्ला प्रहरी कार्यालय मोरङका अनुसार मोरङको सुनबर्सी नगरपालिकामा ९ जना पाकिस्तानी, धनपालथान गाउँपालिका ७ को जामे मस्जिदमा १० भारतीय लकडाउन अघिदेखि बसिरहेका हुन् । जहदा गाउँपालिकामा पर्ने सिक्टी क्षेत्रमा भने १२ जना नेपाली बसेका छन् । उदयपुरको मस्जिदमा संक्रमित भेटिएका कारण यो संख्या बढ्न सक्ने प्रहरी अधिकृत बताउँछन् ।
मस्जिदमा भेटिएका सबै मुस्लिम धर्म गुरु हुन् । उनीहरु सबैको र्यापिड टेस्ट गर्दा एण्टीबडी नेगेटिभ देखिएको छ । जिल्ला प्रहरी कार्यालय मोरङका प्रहरी उपरीक्षक विश्व अधिकारीका अनुसार मस्जिदमा बसेकाहरु प्रहरीको निगरानीमा छन् ।
धनपालथान गाउँपालिकाले भारतीय नागरिक बसोबास गरिरहेको मस्जिदलाई नै क्वारेन्टाइन बनाएको गाउँपालिका अध्यक्ष हरिलाल सिंहले बताए । उनका अनुसार गाउँमा बस्ने सबैको र्यापिड टेष्ट गर्दा सबैको रिपोर्ट नेगेटिभ आएको छ ।
सुनसरीमा ७२ जना विदेशी
यस्तै सुनसरीमा भने ७२ जना विदेशी नागरिक भेटिएका छन् । विदेशी नागरिक पाकिस्तान र भारतबाट आएका हुन् । विभिन्न मस्जिदमा भेटिएकाहरुलाई क्वारेन्टाइनमा राखिएको जिल्ला प्रहरी कार्यालय सुनसरीका डीएसपी विनोद शर्माले बताए ।
‘कोरोनाबारे सचेत नै देखिएनन्,’ उनले भने, ‘संख्या बढ्नसक्ने भएकाले मस्जिद खाली गराएर सबैलाई क्वारेन्टाइनमा राखेका छौं ।’ सुनसरीमा पनि विदेशी नागरिकको संख्या थपिने क्रममा छ ।
कमजोर सुरक्षा संयन्त्र
प्रहरी स्रोतकाअनुसार पछिल्लो समय सम्पर्कमा आएकाहरु सबैले सप्तरीमा भएको धार्मिक सभाका लागि आएको बताएका छन् । सभाका लागि भित्रिएकाहरु तत्कालै भित्रने स्थानीय प्रशासनले बताएको थियो । तर उनीहरु भित्र भित्रै लुकेर बसेको स्थानीय प्रशासनले जानकारी समेत पाएन ।
मस्जिदमा बसेकामध्ये केही मात्र स्थानीय प्रशासनले खोजी गर्दा भेटेका हुन् । मोरङको हकमा भने तीनै स्थानमा बसेकाले लकडाउन कडाई गरेपछि प्रशासनलाई जानकारी गराएका थिए । सुनसरीका डीएसपी शर्मा सर्बसाधारणबाट सहज रुपमा सूचना नै नआएको बताउँछन् ।-अनलाईन खबर
