देवचुलीमा गरीबीको तथ्याङ्क भन्दा दोब्बरले पाए राहत, बास्तविक गरिव दोस्रो राहतको आशमा

खगेन्द्र पराजुली, देवचुली ।
गत चैत्र तेस्रो साता लागेसँगै १ सातामा देबचुलीका १७ वटै वडामा दैनिक ज्यालामजदुरीमा आश्रित तथा बिपन्न परिवारका लागी भन्दै नगरपालिकाले द्रुत गतिमा राहत स्वरुप खाद्य सामाग्री बितरण गर्यो । नगरपालिकाले आफ्नो नगरप्रोफाईलमा उल्लेख गरेभन्दा झण्डै दोब्बर जनसंख्यालाई प्रतिब्यक्ति ५ केजी चामल र प्रतिपरिवार १ केजी दाल र १ केजी नून बितरण गरेको थियो ।
नगरपालिकाले बितरण गरेको उक्त खाद्य सामाग्री प्रति ब्यक्ति प्रति छाक २ सय ५० ग्राम अर्थात् एक दिनको आधा किलो चामलले पुग्ने मापदण्ड निर्धारण गरी बितरण गरेको थियो । नगरपालिकाले करीव २ हजार हाराहारी परिवारका ६ हजार ५ सय जनसंख्यालाई राहत उपलब्ध गराएको तथ्याङ्क गत चैत्रमै निकालेको थियो । त्यसपछि भने लकडाउन क्रमिक रुपमा बढेसँगै बास्तबिक गरीवका चुल्हो बल्न धेरै गाह्रो भएको गुनासो बढ्न थालेको छ ।
नगर प्रोफाईलमा गरिबीको रेखामुनी आय आर्जन नभएका ब्यक्तिहरुको मात्र तथ्याङ्क राखिने हुँदा लकडाउनले दैनिक ज्याला मजदुरी गर्ने, भाडामा बस्ने, आयआर्जनको स्रोत बन्द भएका ब्यक्तिहरुलाई राहत बितरण गर्दा तथ्याङ्क धेरै देखिएको नगरपालिकाले जनाएको छ ।
एकद्धार प्रणाली मार्फत राहत बितरण गर्न स्थानीय सरकारले भूमिका निर्वाह गर्ने नीति नै बनेपछि स्थानीय तहमा बिभिन्न सहयोगी संघ, संस्था, ब्यापारीक प्रतिष्ठान, ब्यक्तिहरुले नगरपालिकामा सहयोग गर्ने लर्को नै लागेको छ । सहयोगीहरुको सहयोग गर्ने क्रम अझै पनि देबचुलीमा रोकिएको छैन । तर, १० दिनलाई पुग्ने राहत सामाग्री दिएपछि नगरपालिका जिम्मेवारीबाट पन्छिएको जस्तो महशुस भएको लकडाउनका कारण दैनिक गुजारामा समस्या भोगिरहेका प्रभावितहरुले बताएका छन् ।