खगेन्द्र पराजुली, देबचुली ।
देबचुली नगरपालिका नवलपुरका ८ वटा पालिकामध्ये कोरोना संक्रमण फैलिन नदिन र रोकथामका उपायलाई मध्यनजर गर्दै सबैभन्दा पहिले पहलकदमी थालेको स्थानीय सरकार हो । यस्तै सम्भावित संकटको परिस्थितिको अनुमान लगाएरै खाद्य बैंकको अवधारणा पनि यसले शुरुमै थाल्यो । दाताहरुको सहयोग समेत उल्लेख्य रुपमा भएको छ । यद्यपि, लकडाउनका कारण दैनिक ज्याला मजदुरीमा निर्भर तथा गरीव–बिपन्न परिवारका लागी बितरण गर्न गरिएको बितरण प्रणाली नियमन गर्न नसक्दा अहिले बास्तबिक प्रभावित बर्गमा प्रत्यक्ष असर पर्न थालेको छ ।
देबचुली नगरपालिकाले १७ वटै वडामध्ये सबैभन्दा धेरै गरीबीको रेखामुनि रहेको वडा भनेर देबचुली १७ रजहरलाई उल्लेख गरेको छ । यहाँका वडाअध्यक्ष बिष्णुप्रसाद आचार्यका अनुसार यो वडामा पिप्रहर, कुजौलीका बोटे–माझी समुदाय, बरटाँडीको तामाङ बस्ती, झराही खोला किनारमा बस्ने बिपन्न–मजदुर परिवार लगायत बास्तबिक विपन्नहरु अहिले समस्यामा परेका छन् ।
वडाध्यक्ष आचार्यले आफूहरुले अलिक पहिले खाद्य सामाग्री बाँडेकाले अहिले समस्या भएको बताउनुभयो । वहाँले भन्नुभयो– अहिले दैनिक १५–२० जनाले राहतको अपेक्षा गरी फोन गर्नुहुन्छ, कोही कोही त घरमै आएर दुखेसो पोख्नुहुन्छ ।
वहाँले एक चरण बितरण गरिएको राहत सामग्री बाड्ने बेलामा कमजोरी भएको बताउनुभयो । सरकारले दिने राहत हामीले किन नपाउने भन्दै आएकाले त्यसवेला आफ्नो वडाका करीव ४ सय हाराहारी परिवारलाई राहत दिएको बताउनुभयो । अहिले खास समस्यामा रहेको परिवार हेर्दा वहाँले १ सय देखी १ सय ५० परिवारलाई बिहान–बेलुका छाक टार्न धौ धौ रहेको बताउनुभएको छ ।
