भिम भुसाल, नवलपरासी
विश्वभर महामारीको रुपमा फैलिरहेको कोरोना भाईरस (कोभिड १९) को संक्रमण नेपालमा पनि बढ्दै गईरहेका बेला सरकारले घोषणा गरेको देशव्यापी लकडाउनको नवलपरासीमा भने चरम उल्लङ्घन भएको छ ।
शुरुवातका केही दिनमा लकडाउनललाई स्थानीय, जनप्रतिनिधि तथा प्रशासनको पहलमा कसिलो बनाईएतापनि पछिल्ला दिनहरुमा मानिसहरुको सडकमा आवतजावत बढेको, खाद्य पसलहरुमा भीड जम्मा हुँदा सामाजिक दुरी कायम नगरेको खुल्ला रुपमा भीड जम्मा पारेर जुवातास खेल्ने गरेको तथा पसलहरु दिनभर खुल्ने गरेको स्थानीयवासीले गुनासो गरेका छन् ।
नवलपरासीको परासी क्षेत्रमा लकडाउनको चरम उल्लङ्घन भएको भन्दै स्थानियले समेत गुनासो गरेका छन् । दैनिक सावरीका साधन निर्वाध सञ्चालन भैरहेका छन् भने सम्पुर्ण पसल, होटल तथा मानिसको हिडडुलमा कुनै किसिमको छेकथुन नभएको परासीका स्थानिय राजेन्द्र यादवले बताए । स्थानिय कृषकहरु दिनहँु एग्रोभेट तथा मल खरिद बिकृ हुने पसलमा सामान्य सुरक्षा सर्तकता समेत नअपनाई भिडभाड गर्ने गरेका छन् ।
परासी क्षेत्रमा उपभोग्य सामाग्रीमा समेत मूल्य मनपरी भएको भन्दै उपभोक्ताले गुनासो गरेका छन् । मोबाईलको रिचार्जकार्ड देखि तेल, दाल, नुन सम्मका खाद्यबस्तुमा समेत मूल्य बढाईएको स्थानिय सुरेन्द्र खड्काले गुनासो गरेका छन् । पसल सञ्चालकहरुले मनपरि बजाउ भाउ राख्दै “सामान खरिद गरे गर नगरे नगर” भन्ने गरेको खड्काले गुनासो गरे ।
पश्चिम नवलपरासीमा देखिएको लकडाउन लापरबाहीले कोरोना त्रासमा चुनौती थपेको छ ।