खगेन्द्र पराजुली, नवलपुर ।
देबचुली नगरपालिकाको वडा नम्वर ९ मा रहेको ऐलानी तथा सार्वजनिक जग्गा वडा कार्यालय मातहतमा ल्याउने निर्णय भएको छ ।
आज मंगलवार वडा कार्यालय परिसरमा बसेको सर्बदलीय बैठकले घुमाउरीदेखी १० नम्वर वडाको सिमानासम्म लोकाहा खोलाले कटान गरेर छोडेको सार्वजनिक जमिन सदुपयोग गर्नका लागी पहलकदमी उठाउन निर्णय नै गरिएको ९ नम्वरका वडाध्यक्ष मेखबहादुर सारुले बताउनुभयो ।
वहाँका अनुसार सो क्षेत्रमा खोलाले छोडेको, खोल्सा–खाल्सी समेत गरी करीव १० देखी १२ बिगाहा ऐलानी जमिन हुनसक्ने अनुमान छ । अव वडाको सर्बदलीय निर्णय भएका कारण नगरपालिकाबाट अमिन प्राबिधिक सहितको टोली ल्याएर क्षेत्रफल नापजाँच गरिने वहाँले बताउनुभयो ।
सो जमिनमध्ये केही भाग स्थानीयले घाँसपात लगाएर उपयोग गरिरहेको र केही भागमा खेतीपाती समेत गरिएको छ । धेरै क्षेत्रफल भने प्रयोग बिहीन रहेको छ ।
वडाध्यक्ष सारुको अध्यक्षमा बसेको बैठकमा वडासदस्यहरु, राजनैतिक दलका प्रतिनिधीहरु, स्थानीय संघसंस्थाका प्रतिनिधीहरु सहित स्थानीय बुद्धिजिबीहरुको संयुक्त बैठकले सर्बसम्मत निर्णय गरेको वडाध्यक्ष सारुले बताउनुभएको हो ।
