लकडाउनका अवधिमा खोल्न निषेध गरिएका क्षेत्र र व्यवसायहरु(बिवरण सहित)

काठमाडौं।

सरकारले थप गरेको लकडाउनको समयावधि आजबाट शुरु भएसँगै केही पेशा र व्यवसाय सञ्चालन गर्न खुकुलो पारिएको छ ।

जेठ ५ गतेसम्म थपिएको बन्दाबन्दीको यस अवधिमा केही क्षेत्र, पेशा र व्यवसाय गर्न भने सरकारले पूर्णतः निषेध गरेको छ । जसमा शैक्षिक प्रतिष्ठानहरु, गैर खाद्य वस्तु बिक्री गर्ने स्थलहरु, मनोरञ्जन स्थलहरु, धेरै मानिस भेला हुने सार्वजनिक स्थलहरु, खेलकूद स्थलहरु, होटल, रेष्टुरेण्टलगायत छन् ।

अर्को आदेश वा सूचना जारी नभएसम्मका लागि निम्न स्थान र स्थलहरू बन्द गरिनेछन् । यसैगरी निम्न क्रियाकलाप पनि गर्न नपाइने सरकारले प्रष्ट गरेको छ ।

यस्ता छन्, सरकारले रोक लगाएका काम र क्षेत्रहरुः

(क) विश्वविद्यालय, क्याम्पस, विद्यालयलगायत सवै प्रकारका शैक्षिक संस्था, तालिम तथा प्रशिक्षण केन्द्रहरू।
(ख) गैरखाद्य वस्तु विक्री गर्ने व्यावसायिक मल, सिनेमा हल, पार्टी प्यालेस, फनपार्कलगायतका सार्वजनिक स्थलहरू ।
(ग) सार्वजनिक जमघट, धार्मिक स्थलहरू (मन्दिर, गुम्बा, मस्जिद, चर्च, गुरुद्वारा आदि) मा हुने भेला एवं धार्मिक तथा सांस्कृतिक कार्यक्रमहरू।
(घ) रङ्गशाला, खेलकुद स्थल, फुटसल, शारीरिक सुगठन गर्ने स्थल तथा जिमखाना, फिटनेस सेन्टर, सैलुन, व्युटीपार्लरहरू ।
(ङ) होटल, वार, रेष्टुरेण्टहरू।
(च) स्थानीय प्रशासनबाट सवारी पास पाएकाबाहेक सवै प्रकारका यात्रुबाहक सवारी साधनहरू।
(छ) १२ वर्ष मुनिका बालबालिका, अशक्त भएका व्यक्ति, विरामी, ७० वर्ष पूरा भएका ज्येष्ठ नागरिक र गर्भवती महिलाहरूको आवतजावत तथा हिँडडुलका गतिविधिहरू।
(ज) आन्तरिक तथा अन्तर्रा्ष्ट्रिय व्यवसायिक यात्रुबाहक हवाई उडान।
(झ) केवलकार सेवा र रेलवे सेवा।

नेपाल राज्यको कुनै भू भागमा संक्रमणको जोखिम देखिएमा वा समुदायस्तरमा उक्त संक्रमण विस्तार भएको पाइएमा उक्त क्षेत्र वा जिल्लाभर माथि प्रकरण ४ मा उल्लिखित क्रियाकलापहरू निश्चित अवधीसम्मका लागि स्थानीय प्रशासनले तत्कालै सञ्चालनमा रोक लगाउन सक्नेछ ।