रजहरको प्राकृतिक चिकित्सालयमा तत्काल १५० वेडको आईसोलेसन बनाउने तयारी

देवचुली ।

नवलपुरको रजहरमा रहेको प्राकृतिक चिकित्सालयमा आईसोलेसन बनाउने तयारी शुरु गरिएको छ । नवलपुर जिल्लामा कोरोना संक्रमितको संख्या बढ्दै जान थालेपछि थप आइसोलेसन कक्षको आबश्यकता महसुस गरि त्यहाँ तयारी शुरु गरिएको प्रमुख जिल्ला अधिकारी पिताम्बर घिमिरेले बताए । जिल्लामा अहिले २४ बेड क्षमताको आईसोलेसन कक्ष मात्र रहेको छ ।

“जिल्लामा भारतबाट आउनेको संख्या बढ्दै गएको छ , संक्रमितहरु थपिन सक्छन् त्यसकारण थप आईसोलेसन कक्षको महसुस गरेका हौं ।” घिमिरेले भने । घिमिरेले रजहरमा रहेको प्राकृतिक चिकित्सालयलाई आईसोलेसन बनाउने गरि गरिएको आग्रह अस्पताल व्यवस्थापनले स्विकार गरेको बताए । “ रजहरमा देशकै नमुना आईसोलेसन कक्ष बनाउन सकिन्छ , भौतिक पुर्वाधारदेखि सबै कुराहरु राम्रा छन् । त्यसलाई उपयोग गर्दा आवश्यक परेको बेलामा जिल्लावासीलाई त्याहाँ राखेर उपचार गर्न सहज हुन्छ ।” घिमिरेले  बताए ।

रजहर प्राकृतिक चिकित्सालयका व्यवस्थापक हरि सापकोटाले जिल्ला प्रसाशन कार्यालय , स्वास्थ्य कार्यालय र स्थानीय पालिकाहरुको आग्रहलाई अस्पताल सञ्चालक समितिले सिवकार गरेको बताए । “महामारीमा सबै एकजुट भएर सामना गर्न आबश्यक छ , विपद्मा सहयोग गरेर अघि बढ्ने निर्णय भएको छ ।” सापकोटाले बताए । सापकोटाका अनुसार बिहिबार दिउँसो अस्पताल सञ्चालक समिति , स्थानीय राजनैतिकदल , नागरिक समाज लगायतको संयुक्त बैठक बसी आईसोलेसन निर्माण गर्न दिने निर्णय भएको छ ।

सापकोटाले भने,“सबै जिललाबासकिो आग्रहलाई स्विकार गरेर अघि बढ्ने सहमती भएको छ , अब आबश्यक व्यवस्थापन सम्बन्धित निकायले गर्ला ।” आईसोलेसन बनाउँदा लाग्ने थप खर्च , आईसोलेसनमा  रहनेहरुका लागि लाग्ने आबश्यक दैनिक खर्च र उपचार खर्चमा अस्पताललाई व्ययभार नपर्ने गरि सहमती दिएको उनले बताए । सापकोटाका अनुसार प्राकृतिका चिकित्सालयमा तत्काल १५० आईसोलेसन वेड तयार गर्न सकिन्छ भने आबश्यकता पर्दा त्यसलाई बढाएर ४ सय ५० वेड क्षमता पुर्याउन सकिन्छ ।
जिल्लामा भारतबाट आउनेको संख्या बढेसंगै थप क्वारेण्टाईन होम र आईसोलेसनको आवश्यकता महसुस गरिएको हो । शुक्रबार बिहान सम्म जिल्लामा भारतबाट आई क्वारेण्टाईनमा बस्नेको संख्या ७ सय भन्दा बढी छ ।- सत्यकलम