चिकित्सकलाई आर्शिवाद दिदै घर फर्किए नवलपुरका वृद्ध दम्पत्ती

 नवलपुर ।

नवलपरासी पूर्वका एक वृद्ध दम्पत्ती कोरोनालाई जितेपछी खुशी हुदै आईशोलेसनबाट घर फर्किएका छन् । नवलपुरको सामुदायिक प्राकृतिक चिकित्सालय (अस्थाई कोरोना अस्पताल)मा उपचाररत गैडाकोटका वृद्ध दम्पत्तीले कोरोनालाई जितेपछी अस्पतालका सम्पुर्ण चिकित्सक सहित कर्मचारीलाई आशिर्वाद दिदै घर फर्किएका हुन् ।

गैंडाकोट वडा नम्बर ८ का ७८ वर्षिय वृद्ध पुरुष र उहाँकी ६७ वर्षिय धर्मपत्निले ११ दिनमा कोरोनालाई जितेर आज घर फर्किएका छन् । उनीहरुसँगै आज निको हुनेहरु ४ पुरुष सुरक्षाकर्मिहरु छन् । उनीहरु गत साता सक्रमित भएका थिए । गैंडाकोट नगरपालिका वडा नं. १ का एकजना, वडा नं. २ का पाँच जना, वडा नं. ६ का एकजना र वडा नं. ८ का दुई जनाको कोरोना परिक्षण नेगेटिभ आएपछी डिस्चार्ज गरिएको अस्पतालका निर्देशक डाक्टर बिनोद पौडेलले जानकारी दिनुभयो । आज निको हुनेहरु १४ देखी ७८ बर्षसम्मका रहेका छन् ।

हिजो (आइतबार) मात्रै सामुदायिक प्राकृतिक चिकित्सालयबाट ४७ जना कोरोना मुक्त भएर घर गएका थिए । अब चिकित्सालयमा ३१ जना कोरोना संक्रमित उपचाररत रहेका छन् ।
यो सँगै नवलपरासी पुर्वमा कोरोना मुक्त हुनेको संख्या २ सय ७७ पुगेको छ भने संक्रमितको संख्या ३ सय ९ रहेको छ ।