काठमाडौं ।
देशमा पाँच महिनाभन्दा बढी समयदेखि कोरोनाको महामारी छ । कोरोना त्रासले जनताको उठिबास लागिसक्यो । अर्थतन्त्र चौपट भएको छ । कृषकले मल पाएका छैनन् । उद्योग,व्यवसाय झन्–झन तहसनहसको अवस्थामा पुगिसकेको छ । भिजिट नेपाल २०२० को नाममा पर्यटनमा गरिएको अर्बौं लगानी त्यत्तिकै खेर गएको छ ।
तर, नेकपाका केही नेताहरु यहीबीचमा रोजेको ठाउँमा पुगेका छन् । अर्थात् जनमतबाट तिरस्कृत भएकाहरु नेकपाबाट पुरस्कृत भएका छन् । निर्वाचनमा जनताबाट नरुचाइएका नेताहरुलाई अहिले प्रदेश प्रमुखदेखि राष्ट्रिय सभासम्म पुर्याएर नेकपाले पुरस्कृत गरेपछि जनमतको अपमान भएको चर्चा शुरु भएको छ ।
स्थानिय निर्वाचनमा झापाको मेचीनगरको नगरप्रमुखमा पराजित भएका विष्णुप्रसाद प्रसाईं अहिले प्रदेश ३ अर्थात् बागमती प्रदेशको प्रमुख छन् । उनलाई ओली सरकारले अनुराधा कोईरालाको ठाउँमा नियुक्त गरेको हो ।
यता गएको निर्वाचनमा गोरखा क्षेत्र नं.२ बाट पराजित नेकपा प्रवक्ता नारायणकाजी श्रेष्ठ चुनाव हारेको २ वर्षमा नै राष्ट्रिय सभामा पुगे । गोरखा–२ बाट पूर्व प्रधानमन्त्री डा.बाबुराम भट्टराईसँग ६ हजारभन्दा बढी मतले पराजित भएका श्रेष्ठलाई नेकपा अध्यक्षद्धय केपी शर्मा ओली र पुष्पकमल दाहाल प्रचण्डले पुरस्कृत गर्दै राष्ट्रिय सभा पुर्याएका हुन् ।
पार्टी उपाध्यक्ष वामदेव गौतम पनि गएको निर्वाचनमा बर्दियाबाट पराजित भएका थिए । काँग्रेसका सञ्जय गौतमसँग पराजित भएका वामदेवलाई पनि प्रधानमन्त्री ओली र अध्यक्ष प्रचण्डकै योजनामा राष्ट्रिय सभामा लगिँदैछ । पार्टीभित्रको विवाद मिलाउन भूमिका खेलेको भन्दै जनताबाट तिरस्कृत भएपनि गौतमलाई राष्ट्रपतिमार्फत मनोनित गराएर राष्ट्रियसभामा लैजाने निर्णय नेकपाले गरिसकेको छ ।
यसैगरी गएको निर्वाचनमा तनहुँको भानु नगरपालिकाबाट पराजित नेकपा नेतृ भगवती न्यौपाने पनि यतिबेला राष्ट्रियसभा पुगिसकेकी छन् । काँग्रेसका उदयराज गौलीसँग मेयरमा पराजित न्यौपानेलाई नेकपाले पुरस्कृत गर्दै राष्ट्रियसभामा पठायो ।
त्यस्तै कपिलबस्तुको वाणगङ्गा नगरपालिकाको मेयरमा पराजीत विमला घिमिरे पनि अहिले राष्ट्रियसभामै छिन् । उनलाई पनि जनताको मतबाट निर्वाचित हुन नसकेपनि नेकपाले राष्ट्रिय सभामा पुर्याइदिएको छ ।
यता प्रदेशसभा निर्वाचनमा दाङको क्षेत्र नं–२ (क) बाट पराजित जगप्रसाद शर्मालाई पनि नेकपाले राष्ट्रियसभामा लगेको छ । उनी काँग्रेसका डिल्ली चौधरीसँग प्रदेशसभामा पराजित भएका थिए । यसअघि पनि जनताबाट पराजित भएकालाई आफुखुशी रोजेको पदमा पुर्याउने काम नभएका भने होइनन् । २०६४ को संबिधानसभा निर्वाचनमा काठमाडौं र रौतहट दुई ठाउँबाट चुनाव हारेका नेता माधवकुमार नेपाललाई तात्कालीन समयमा पुनःमनोनित गर्दै प्रधानमन्त्री बनाउने सम्म काम भएको हो ।
त्यसैगरी अर्को अचम्मको कुरा यतिबेला नेकपाको ९ सदस्यीय हाईकमाण्ड अर्थात सचिवालयमा रहेका सबैले रोजेको पद आफैंले पाएका छन् । कतिले गुटका लागि बार्गेनिङमा मुख्यमन्त्री र मन्त्री लिँदैछन् भने केही नेताले विभिन्न प्रतिष्ठानको नाममा ठुलो रकम राज्यकोषबाट लिएको चर्चा छ । यसले कम्युनिष्ट सिद्धान्त र आदर्शको धज्जी उडाएको मात्रै छैन कि जनताको अपमान समेत भएको छ ।
नेकपा सचिवालयमा रहेका ९ जनामध्येका सर्वोच्च नेता केपी ओली प्रधानमन्त्रीसहित पार्टी अध्यक्ष छन् । अर्का अध्यक्ष पुष्पकमल दाहालले उधारोमै भएपनि अहिले कार्यकारी र महाधिवेशनपछि शक्तिशाली अध्यक्षको पद पाउने भएका छन् । वरिष्ठ नेता झलनाथ खनालले सर्प पाल्न राज्यकोषबाट ७२ करोड पाएका छन् भने अर्का नेता माधव कुमार नेपालले दुई मुख्यमन्त्री सहित रोजेका केही मन्त्रालय लिएर आफ्नो गुट जोगाउने अवसर पाउँदैछन् ।
उपाध्यक्ष गौतम र प्रवक्ता श्रेष्ठ राष्ट्रियसभामा, अर्का नेता ईश्वर पोख्रेल रक्षामन्त्री र नेता रामहादुर थापा बादल गृहमन्त्री छन् । बाँकी रहेका पार्टी महासचिव विष्णु पौडेल पनि सरकारमा अर्थमन्त्रीका लागि दाबी गरिरहेका छन् ।
