कोरोना कहर, २० घण्टाको शिशुमा पनि देखियो संक्रमण

पोखरा ।
प्रादेशिक राजधानी पोखरामा २० घण्टाको नवजात शिशुमा कोरोना संक्रमण पुष्टि भएको छ । गण्डकी प्रदेश स्वास्थ्य निर्देशनालयका निर्देशक डा. विनोदविन्दु शर्माका अनुसार पोखरा मानगरपालिका-४ का नवजात शिशुमा कोरोना संक्रमण पुष्टी भएको छ । शिशुलाई पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पतालको एनआइसियुमा भर्ना गरिएको छ ।
निर्देशनालयले बुधबार दुई विज्ञप्ति जारी गर्दै गण्डकी प्रदेशमा थप ३३ जनामा कोरोना संक्रमण पुष्टि भएको जनाएको छ । निर्देशनालयका अनुसार बुधबार थपिएका सहित प्रदेशमा जम्मा संक्रमितको संख्या तीन हजार आठ सय ६६ पुगेको छ । संक्रमित मध्ये  अहिलेसम्म दुई हजार सात सय ३५ जना भने निको भइसकेका छन् । हाल सक्रिय संक्रमितको संख्या एक हजार ९८ छ ।
गण्डकी प्रदेशमा अहिलेसम्म ६८ हजार नौ सय ७५ जनाको पिसिआर विधिबाट परीक्षण भइसकेको छ । कोरोना संक्रमणका कारण अहिलेसम्म यहाँ ३३ जनाले ज्यान गुमाएका छन् ।