सर्वोच्च अदालतका न्यायाधीशमा देखियो संक्रमण, एकल इजलास मात्र सञ्चालन

काठमाडौं ।
सर्वोच्च अदालतले कोरोना भाइरस संक्रमणका कारण एकल इजलास मात्र सञ्चालन गरेको छ । केही न्यायाधीशमा संक्रमण देखिएपछि सर्वोच्चले एकल इजलास मात्र सञ्चालन गरेको अदालतका सहप्रवक्ता देवेन्द्र दाहालले जानकारी दिए । उनका अनुसार सर्वोच्चमा संक्रमणका कारणले केही न्यायाधीश अहिले होम आइसोसनमा रहेका छन् । यसअघि सर्वोच्चमा एकल, संयुक्त र बृहत् इजलास सञ्चालन हुने गरेको थियो ।

आइतबार पनि प्रधानन्यायाधीश चोलेन्द्रशमशेर जबरा र अर्का न्यायाधीश डा मनोजकुमार शर्मा मात्र अदालत गएका थिए । सहप्रवक्ता दाहालले एकल इजलासबाट रिट निवेदन, प्रारम्भिक सुनुवाइ हुने खालका र नगरी नहुने निवेदनको मात्र सुनवाइ हुने जानकारी दिए । सर्वोच्च अदालतले जारी गरेको सूचनामा अदालतका न्यायाधीश, केही अधिकृत र कर्मचारी संक्रमित हुनुभएको र संक्रमित सबै होम क्वारेन्टाइन, आइसोलेसनमा रहेको जनाइएको छ ।

रासस