नारायणगढ–बुटवल सडकमा कार्यरत मजदुरहरुको माग सम्बोधन हुने

देवचुली ।
नारायणगढ–बुटवल सडकखण्डमा कार्यरत आन्दोलित मजदुरहरुको माग सम्बोधन हुने भएको छ । समयमा तलव नपाएको, विना कारण कामबाट निकालिएको र कामदारको उचित व्यवस्थापन गर्न नसकेको भन्दै सडकखण्डमा कार्यरत मजदुरहरु आन्दोलनमा उत्रिएका थिए ।
प्रमुख जिल्ला अधिकारी मनमाया पंगेनिको अध्यक्षतामा मजदुरका प्रतिनिधि र व्यवस्थापन पक्ष विच आज भएको वार्तामा मजदुरहरुको माग पुरा गर्ने गरी दुई महत्वपूर्ण निर्णय भएको छ । मजदुरहरुको मागलाई तत्कालिन र दिर्घकालीन गरी दुई भागमा विभाजन गरिएको छ ।
तल्काल पुरा गर्नु पर्ने माग
१) न्यूनतम डिउटी अवधी ८ घण्टाको हुने , ८ घण्टा भन्दा बढी काम लगाएमा १.५ गुणाको दरले प्रती घण्टा ओभर टाईम दिने । २) शनिवार काम गरेको ओभर टाइम १.५ गुणाले दिने ।
३) प्रत्येक कामदारको न्यूनतम सेवा सुविधा र क्षतिपूर्ति उल्लेख गरी सम्झौता गर्ने ।
४) साइडमा काम गर्ने मजदुरलाई सुरक्षाका न्यूनतम सामग्री उपलब्ध गराउने ।
५) प्रत्येक कामदारको दुर्घटना बिमा गर्ने ।
६) कामको सिलसिलामा घाइते , अस्वस्थ्य भएमा तत्काल उपचारको व्यवस्था गर्ने ।
७) कामदारलाई अनिवार्यरुपमा परिचय पत्र उपलब्ध गराउने ।
८) मजदुर बस्ने क्याम्पको उचित सरसफाईको व्यवस्था गरिनु पर्ने ।
९) कार्यस्थलमा कार्यसम्पादन गर्दा कामदारबाट कुनै गल्ती हुन गएमा सुधारको लागि उचित मौका दिइनुपर्ने ।
१०) कामदारले काम गर्दा कुनै दुर्घटना तथा कुनै सवारीमा क्षती पुगेमा के कसको लापरवाहीले भएको हो आवश्यक छानविन गरिनेछ । छानवीनबाट आएका रिपोर्टको आधारमा थप कारबाही अगाडि बढाइनेछ ।
ख) दिर्घकालमा पुरा गर्नु पर्ने माग
१) कामदार ट्रान्सपोर्टेसन को लागि बसको सुविधा ।
२) कामदारको कार्यदक्षता अनुसारको उचित पारिश्रमिक निर्धारण
३) नेपाल सरकारको श्रम ऐनले तोकेको सेवा सुविधा ।
तत्काल पुरा गर्नुपर्ने मागलाई एकहप्ता भित्र पुरा गर्ने गरि सहमती भएको छ । त्यस्तै मजदुर पक्षले पेश गरेको माग पुरा भए नभएको सम्बन्धमा अनुगमन गर्न समितिको गठनपनि गरेको छ ।