नारायण पंगेनी अरुणखोला (नवलपुर) ।
शिक्षा, स्वास्थ्यदेखि वन, खानेपानी तथा सामुदायिक संघ संस्थाहरुमा दलीय प्रतिनिधित्वले पार्टीको चुनाव जस्तो हुने गरेको छ ।
सामाजिक संस्थाहरुमा राजनीतिक दलहरुले पार्टीको प्यानल नै बनाएर चुनाव भाग लिने मात्र नभई हरतरहले कब्जा गर्ने परिपाटी बढ्न थालेको छ ।
नवलपरासीपूर्व मध्यविन्दु नगरपालिका ११ कुसुण्डेको सामुदायिक वनमा विवादकाबीच नेपाली कांग्रेसले विजयी भएको स्वघोषणा गरेको छ ।
यसको पछिल्लो उदाहरण वनेको छ, नवलपरासीपूर्व मध्यविन्दु नगरपालिका ११ अरुणखोलास्थित जनजागरण सामुदायिक वन उपभोक्ता समूह ।
मंसिर २० गते उक्त सामुदायिक वनको ८ औं अधिवेशनको उद्घाटन सत्र सकिएपछि समूहमा कब्जा जमाउन मुख्यतः दुई राजनीतिक दल नेपाल कम्युनिस्ट पार्टी ९नेकपा० र नेपाली कांग्रेसबीच रस्साकस्सी चल्यो ।
दुई पार्टीका स्थानीय नेताहरुबीच सहमति नजुटेपछि निर्वाचनबाट नयाँ कार्यसमिति चयन गर्न भन्दै निर्वाचन प्रक्रिया सुरु भयो ।
मतदानबाटै नयाँ कार्यसमिति चयन प्रक्रिया सुरु भएपछि दुई दलको संघर्ष झनै उत्कर्षमा पुग्यो ।
निर्वाचन प्रक्रिया अन्तर्गत उम्मेदवार मनोनयन दर्तासम्म आइपुग्दा एउटा समूहले अर्को समूहको उम्मेदवार अपहरण गर्नेसम्मका घट्ना भए । मध्यविन्दु नगरपालिका ११ नम्बर वडाका अध्यक्ष चन्द्रबहादुर दरैका छोरा जनक दरैले नेकपा समूहबाट उम्मेदवार बनेका जीतबहादुर कुमाललाई उम्मेदवार दर्ता गर्ने अवधिभर बेपत्ता बनाएपछि अर्को खैलाबैला मच्चियो ।
आफ्नो उम्मेदवारलाई निर्वाचनमै भाग लिनबाट रोकेर वातावरण असहज वनाएको भन्दै नेकपा समूहले निर्वाचन प्रक्रिया रोक्न माग गर्दै निर्वाचन प्रक्रियाबाट बाहिरियो । उम्मेदवार नै धपकपड गर्ने अवस्था आएपछि उपभोक्ताले सहज रुपमा मतदान गर्ने वातावरण नबन्ने भन्दै आफ्नो समूह निर्वाचन प्रक्रिया रोक्न माग गर्दै बाहिरिएको नेकपा समूहबाट अध्यक्षका प्रत्यासी इमानसिंह बस्नेतले बताए ।
विवाद चर्किँदै जाँदा निर्वाचन मण्डलका नेकपाका सदस्य कृष्ण पाण्डे पनि निर्वाचन मण्डलबाट बाहिरिएका थिए । निर्वाचन मण्डलकै सदस्य बाहिरिए पनि निर्वाचन मण्डलका अध्यक्ष सूर्यप्रसाद भण्डारीले निर्विरोध घोषणा गरी प्रकाशित गरिदिएपछि नेकपा समूहले अस्वीकार गर्दै आएको छ ।
नेपाली कांग्रेस समूहले भने अर्को समूह निर्वाचन प्रक्रियाबाटै बाहिरिएकाले आफूहरु निर्विरोध भएको दाबी गर्दै आएका छन् ।
निर्वाचनमा भाग नलिनेबारे भनेर निर्वाचन मण्डललाई निवेदन दिएका नेकपा समूहलाई पटक पटक बोलाउँदा पनि नआएकाले रित बमोजिम आफूले अन्तिम नामावली प्रकाशित गरेको र मंसिर २७ गते निर्विरोध निर्वाचित घोषणा गरिएको निर्वाचन मण्डलका अध्यक्ष भण्डारीले दाबी गरे ।
सहमतिमा जान पनि नमानेको र चुनावमा पनि जान नमानेपछि निर्वाचन मण्डलले आफूलाई अध्यक्षमा निर्विरोध घोषणा गरेको कांग्रेस समूहका अध्यक्षका प्रत्यासी ज्ञानबहादुर दरैले दाबी गरे ।
दुबै पक्षबीच सहमति नजुटेपछि निर्वाचन प्रक्रियामा भाग नलिएर एउटा समूह बाहिरिएपछि अध्यक्ष मण्डलले घोषणा गरेकाले आफूहरु बैध भएको कांग्रेस समूहबाटै कोषाध्यक्षमा निर्वाचित भनिएका प्रकाश ढकालले उल्लेख गरे ।
सहमतिको प्रयास गरिए पनि विगतदेखि नै दलीय भागबण्डा हुने गरेको स्वीकार्दै रित बमोजिम निर्विरोध घोषणा गरिएकाले आफूले पद हस्तान्तरण गरिसकेको निवर्तमान अध्यक्ष विमला सापकोटाले बताइन् । सापकोटा यसअघि दुई कार्यकाल वन समूहको नेतृत्व सम्हालेकी थिइन् ।
आफूहरुलाई उम्मेदवार मनोयन गर्नै नदिएर घोषणा गरिएको निर्वाचन आफूहरुलाई स्वीकार्य नभएको भन्दै नेकपा समूहले बहुमत उपभोक्ताको हस्ताक्षर जुटाएर डिभिजन वन कार्यालय नवलपरासीपूर्वमा बुझाएको छ ।
३ सय ७९ उपभोक्ता सदस्य रहेको जनजागरण सामुदायिक वनमा बहुमत उपभोक्ताको हस्ताक्षर डिभिजन वन कार्यालय नवलपुरमा बुझाइएको बस्नेतले बताए ।
निर्वाचन मण्डलका एक सदस्य बाहिरिएपछि पनि सहमति नजुटाइ एकपक्षीय निर्विरोध नयाँ कार्यसमितिलाई बहुमत सदस्यले अस्वीकार गर्दै आएका छन् । यसले गर्दा वन समितिको कार्यसञ्चालन मात्र होइन, वन संरक्षणमा गम्भीर प्रश्न चिन्ह खडा भएको छ ।
