नवलपुरमा निशुल्क स्थायी बन्ध्याकरण शिविर शुरु

ज्ञानु पंगेनी, नवलपुर ।

नवलपुरमा बुधबारदेखि निशुल्क स्थायी बन्ध्याकरण शिविर सुरु भएको छ ।

देवचुली नगरपालिका स्थित दुम्कौली प्राथमिक स्वास्थ्य केन्द्रबाट शिविरको सुरुआत गरिएको छ । बुधबारदेखि सुरु भएको शिविर माघ २९ गते सकिने छ । स्वास्थ्य कार्यालय नवलपरासी पूर्वरको आयोजना तथा स्थानीय तहको समन्वय र सुनौलो परिवार नेपाल (मेरी स्टोप्स ईन्टरनेशनल)को सहयोगमा शिविर सञ्चालन गरिएको हो ।
जिल्लाका ८ वटै पालिकाका १२ र जिल्ला अस्पतालमा गरी १३ स्थानमा शिविर सञ्चालन हुने जिल्ल स्वास्थ्य कार्यालयका परिवार नियोजन निरिक्षक (सुपरभाईजर) बीर वहादुर श्रेष्ठले जानकारी दिनुभयो । निरिक्षक श्रेष्ठका अनुसार कावासोती नगरपालिका अन्तर्गत मध्यबिन्दु जिल्ला अस्पतालमा माघ ८, ९ र १० गते लगातार ३ दिन शिविर चल्नेछ ।
मध्यबिन्दु नगरपालिकाका ३ ठाउँमा एक–एक दिन शिविर सञ्चालन हुने भएको छ । जसअन्तर्गत नयाँ बेलहानी स्वास्थ्य चौकीमा १२ गते, चोरमारा प्राथमिक स्वास्थ्य केन्द्रमा १३ गते र नवलपुर स्वास्थ्य चौकीमा १४ गते शिविर सञ्चालन हुनेछ । बिनयी त्रिबेणी गाउँपालिकामा त्रिबेणी सुस्ता स्वास्थ्य चौकीमा माघ १६ र दुम्किबास स्वास्थ्य चौकीमा माघ १८ गते शिविर हुने छ । भने , हुप्सेकोट गाउँपालिकाको हुप्सेकोट स्वास्थ्य चौकीमा माघ २० र देउराली स्वास्थ्य चौकीमा २२ गते बन्ध्याकरण शिविर आयोजना गरिएको छ । बौदीकाली गाउँपालिकामा रकुवा प्राथमिक स्वास्थ्य केन्द्रमा माघ २४ गते र बुलिङ्टारको कोटथर स्वास्थ्य चौकीमा २५ तथा जौवारी स्वास्थ्य चौकीमा २७ गते शिविर सञ्चालन गरिने छ । यस्तै माघ २९ गते गैंडाकोटको प्रस्तावित गैंडाकोट नगर अस्पताल पिजौजी स्वास्थ्य चौकीमा शिविर सञ्चालन गरेपछि सम्पन्न हुने श्रेष्ठले जानकारी दिनुभयो ।
शिविरमा सन्तानको रहर पुगेका पुरुषका लागि भ्यासेक्टोमी र महिलाका लागि मिनिल्यापको सेवा निशुल्क रहेको श्रेष्ठले बताउनुभयो । साथै शिविरमा बन्ध्याकरण गर्ने सेवाग्राहिलाई सरकारको तर्फबाट खाजाखर्च समेत उपलब्ध गराउने र सेवाग्राहिलाई निशुल्क घरसम्मै पु¥याउने श्रेष्ठले जानकारी दिनुभयो ।
स्वास्थ्य कार्यालयले जिल्लामा प्रतेक वर्ष शिविर सञ्चालन गर्दै आएको छ । सन्तानको रहर पुगेका दम्पत्तीहरुलाई घरदैलोमा नै स्थाई बन्ध्याकरण सेवा पु¥याउने , थोरै सन्तान भए उनीहरुको भविश्यका लागि लगानी गर्न सजिलो हुन्छ भन्ने सन्देश दिने र विकाससंगसंगै परिवार नियोजन पनि आवश्यक छ भन्ने कुरा बुझाउने यस कार्यक्रमको उदेश्य रहेको स्वास्थ्य कार्यालय नवलपरासी पूर्वका प्रमुख केशव प्रसाद चापागाईंले बताउनुभयो ।
जिल्लामा गत वर्षको तथ्याङ्क हेर्दा महिला भन्दा पुरुषको संख्या नै बढि हुने गरेको चापागाईं बताउनुहुन्छ । गत वर्षको तथ्याङ्क अनुसार ६० प्रतिशत पुरुष र ४० प्रतिशत महिलाले स्थाई बन्ध्याकरण गरेका थिए । यस वर्ष पनि पुरुषको संख्या बढि हुने नभए बराबरी हुने आकलन गरिएको चापागाईंको भनाई छ ।
सल्यक्रियाका लागि डाक्टर सूर्यदेवको नेतृत्वमा टोली खटिएको छ । स्वाथ्यकर्मी र महिला स्वास्थ्य स्वयमसेविका सहित गरि दैनिक रुपमा कम्तिमा २५ देखि ३० जनाको टोली शिविरमा खटिने चापागाईले बताउनुभयो ।