काठमाडौं ।
हामीले हरेकदिन दिनभरिका महत्वपूर्ण समाचारहरुलाई केन्द्रबिन्दु बुलेटिनका रुपमा प्रस्तुत गर्ने गरेका छौं । आज पनि हामीले यस्तै समाचारहरु प्रस्तुत गरेका छौं । आजका मूख्य समाचारहरु मध्ये सभामुख अग्नि सापकोटाले संवैधानिक परिषदबाट भएका नियुक्ति फिर्ता गरेका छन् । मुख्य सचिवलाई पत्राचार गर्दै सभामुख सापकोटाले पुस ५ गते प्रतिनिधिसभा विघटन भएकाले संसदीय सुनुवाई गर्न नसकिने लगायतका कारणहरु देखाउँदै नियुक्तिको सिफारिस फिर्ता गरेका हुन् । सभामुख सापकोटाले निर्णय प्रक्रियाको वैधानिकतामाथि नै प्रश्न उठाएपछि अब, सरकार र प्रतिनिधिसभाबीच अर्को मतभेद चर्किने संकेत देखिएको छ ।
प्रतिनिधिसभा विघटनविरुद्ध काठमाडौंको माइतीघर मण्डलामा जारी धर्ना कार्यक्रमलाई नेकपाको प्रचण्ड–माधव पक्षले पूर्व निर्धारित समय अघि नै टुंग्याएको छ । ४ दिनदेखि माइतीघर मण्डलमा धर्ना दिइरहेको सो पक्षले यसअघि २१ माघसम्म धर्ना जारी राख्ने गरी कार्यक्रम घोषणा गरेपनि आइतबार अध्यक्षद्वय प्रचण्ड र माधवकुमार नेपालसमेत सहभागिता पछि धार्ना कार्यक्रम टुंग्याएको हो । यसैबीच धर्नामा उपस्थित नेताहरूले प्रधानमन्त्री ओली प्रतिक्रियावादीको मतियार बनेर इतिहासको कुपात्र बनेको नेताहरूको टिप्पाणी गरेका छन् ।
प्रधानमन्त्री केपी शर्मा ओली नेतृत्वको नेकपाको वाग्मती प्रदेश कमिटीले यही माघ २३ गते काठमाडौंमा गर्ने जनसभाको तयारी थालेको छ । सवारी आवत जावत र ट्राफिक जामलाई मध्यनजर गर्दै सभाको आयोजनास्थल नारायणहिटी दरबार संग्रहालयको दक्षिण ढोकातर्फको सडकलाई चयन गरिएको कमिटीले जनाएको छ, भने सभामा मानिसको चाप पनि धेरै हुने ओली पक्षको दावी छ । तर, नेकपाको दाहाल–नेपाल समूहले भने, सोही जनसभाबाट प्रधानमन्त्री ओलीले हिन्दू राष्ट्र घोषणा गर्न सक्ने आरोप लगाएको छ ।
अमेरिकाको आर्थिक वृद्धिमा सन् २०२० मा ३.५ प्रतिशतले गिरावट आएको छ । अमेरिकाको अर्थतन्त्रको आकार यति धेरैले घटेको सन् १९४६ अर्थात् दास्रो विश्वयुद्धपछिकै पहिलो पटक भएको तथ्यांकले देखाएको हो । यद्यपि, अमेरिकाका फेडरल रिजर्वका अध्यक्ष जेरोम पावलका अनुसार पछिल्लो महिनामा भने आर्थिक सुधार सुस्त देखिएको छ ।
विभागीय टिम नेपाल पुलिस क्लब राष्ट्रिय महिला लिग फुटबलमा चन्द्रपुरलाई ३–१ गोलअन्तरले पराजित गर्दै लिगको दोस्रो स्थानमा उक्लिएको छ । सातदोबाटोस्थित् एन्फा कम्प्लेक्समा भएको खेलमा पुलिसले चन्द्रपुरविरुद्ध सहज जीत निकाल्दै लिगको दोस्रो स्थानमा उक्लिएको हो भने, खेलमा हार बेहोरेको चन्द्रपुर लिगको छैटौं स्थानमा रहेको छ ।
