खगेन्द्र पराजुली, नवलपुर ।
स्वास्थ्य कार्यालय नवलपुरले जिल्लाका प्रहरी कर्मचारीलाई बिषादीमुक्त खाद्य वस्तुको प्रोत्साहन गर्दै नागरिकको सेवामा पुग्ने मदतका विषयमा अभिमुखीकरण गरेको छ ।
जिल्लाका बिभिन्न पालिकामा पुगेर अगुवा कृषक, जनप्रतिनिधि, टोल सुधार तथा बिकास समितिका सरोकारवाला लक्षित अभिमुखीकरण गरेपश्चात् पछिल्लो सत्रमा प्रहरी कर्मचारी लक्षित कार्यक्रम गरिएको स्वास्थ्य कार्यालय नवलपुरका तथ्याङ्क सहायक शिवशरण पराजुलीले जानकारी दिए ।
कावासोतीस्थित सामुदायिक प्रहरीको भवनमा भएको अभिमुखीकरणमा कृषि उत्पादनमा प्रयोग हुने बिभिन्न प्रकारका बिषादी मानव स्वास्थ्यका लागि बिष नै भएकाले यसको प्रयोग नियन्त्रण र बिषादीयुक्त बस्तु उत्पादनमा न्युनीकरण गर्न प्रहरी–प्रशासनको ठूलो भुमिका हुनेमा प्रशिक्षकको जोड थियो । स्वास्थ्य कार्यालय नवलपुरका प्रमुख केशव चापागाई र कृषि ज्ञान केन्द्र नवलपुरका प्रमुख गोपाल लामिछानेले प्रहरीलाई अभिमुखीकरण गरेका थिए ।
नेपालमा अत्याधिक उत्पादनको लोभमा किट–रोगनाशक, छिटो बढाउने, खाद्यबस्तु नसडोस् भनेर लुकाईछिपाई प्रतिबन्धित औषधि बिक्री बितरण हुने भएकाले यसको नियमन, अनुगमन, अनुसन्धान र कानूनी कारवाहीमा सक्रियता देखाउने हो भने नागरिकको स्वास्थ्य सुरक्षामा मदत पुग्ने अभिमुखीकरणमा बताईएको छ ।तथ्याङक सहायक पराजुलीले पहिलो चौमासिकको कार्यक्रम अन्तर्गत अभिमुखीकरण गरिएको बताए ।
जिल्लामा ५ वटा अभिमुखीकरण सम्पन्न गर्ने लक्ष्य रहेकोमा मध्यबिन्दु, हुप्सेकोट, बौदीकाली, बुलिङटारमा अगुवा कृषक, जनप्रतिनिधि, टोल सुधार तथा बिकास समितिका सरोकारवालालाई र कावासोतीमा पत्रकार र सुरक्षाकर्मी कर्मचारीलाई गरी ११ वटा कार्यक्रम सम्पन्न भएको जनाईएको छ ।
