नवलपुरको विकासमा प्रतिबद्ध छु : मुख्यमन्त्री पोखरेल  

नवलपुर । गण्डकी प्रदेशका मुख्यमन्त्री कृष्णचन्द्र नेपाली पोखरेलले नवलपुरको विकासका लागि प्रतिबद्ध रहेकाे बताउनुभएको छ । मुख्यमन्त्री भएपछि पहिलो पटक गृह जिल्ला नवलपुर आउनुभएका उहाँले आफुलाई मुख्यमन्त्री बनाउन योगदान गर्ने नवलपुरबासीलाई बधाई समेत दिनुभयो । नवलपुरबासीले नै निर्वाचनमा आफुलाई जिताएर मुख्यमन्त्री बनाउन गरेको योगदानको कदर गर्दै आफ्नो तर्फबाट पनि सक्दो सहयोग गर्ने बताउनुभएको हो ।
नेपाली कांग्रेस प्रदेश क्षेत्रिय समिति क्षेत्र नं. १ क नवलपुरको आयोजनामा गैँडाकोट १३ मा भएको स्वागत तथा बधाई कार्यक्रममा बोल्दै उहाँले सो कुरा बताउनुभएको हो । सो अवसरमा २८० जना विभिन्न पार्टीका नेता कार्यकर्ता कांग्रेसमा प्रवेश गरेको प्रदेश क्षेत्रिय समिति क्षेत्र नं. १ क का सभापति खेमप्रसाद सापकोटाले जानकारी दिनुभयो ।
सो अवसरमा पार्टीका जिल्ला सभापति एवं गण्डकी प्रदेश सांसद विष्णुप्रसाद लामिछाने, सांसद ओमकला गौतम, संविधानसभा सदस्य महेन्द्रध्वज जिसि, पार्टीका जिल्ला कोषाध्यक्ष ओमप्रसाद सापकोटा लगायत नेता कार्यकर्ताको उपस्थिति रहेको थियो ।
मुख्यमन्त्रीमा निर्वाचित भएपछि पहिलो पटक जिल्ला आउनुभएको मुख्यमन्त्रीलाई भव्य स्वागत गरिएको छ । बिहान गैँडाकोटमा उहाँलाई स्वागत गरिएको हो ।
बिहान राष्ट्रिय जनमोर्चा जिल्ला समिति नवलपुरले हार्दिक बधाई तथा शुभकामना सहित विभिन्न ७ बुँदे अनुरोध पत्र पेश गरेको छ । राष्ट्रिय जनमोर्चाका जिल्ला अध्यक्ष दिपक पाण्डेले कोभिड व्यवस्थापन, वाढि पिडितलाई राहत, त्रिवेणीसँगको सहजमार्ग लगायतका विषयमा सम्वोधन गर्न माग गर्दै ज्ञापनपत्र बुझाउनुभएको हो ।
दुई दिने बसाईका क्रममा जिल्लाका विभिन्न स्थानमा विभिन्न कार्यक्रम तय गरिएको छ ।