अझै खुल्न सकेन त्रिवेणी भन्सार

भारततर्फको भन्सार नखुलेका कारण समस्या भएको त्रिवेणी भन्सार कार्यालयका प्रमुख विकास उपाध्यायले बताए । नेपालबाट सामान र मान्छे पठाउँदा उता रोक्ने गरिएका कारण त्रिवेणी भन्सार मात्र खोल्नुको अर्थ नभएको उनको भनाइ छ । भारततिरको भन्सार नखुलेसम्म दुवैतिरका गतिविधि रोकिन्छन् । भारतको केन्द्र सरकारले वाल्मीकि नगर भन्सार खोल्ने परिपत्र नगरेका कारण समस्या थपिएको छ । वाल्मीक नगरका भारतीय सांसद (विधायक) सँग पनि नाका खोल्नेबारे पहल गर्न आफूले अनुरोध गरिसकेको उपाध्यायले जानकारी दिए ।

गण्डकी प्रदेश र भारत जोड्ने एक मात्र त्रिवेणी नाका १८ महिनाअघिबाट सिल थियो । सरकारले तत्काल त्रिवेणी नाका खोल्न परिपत्र गरिसकेको छ । तर, भारततर्फको नाका सिल नै रहेका कारण सामान आयातनिर्यात हुन नसकेको हो । त्रिवेणी छोटी भन्सारलाई एक वर्षअघि सरकारले मूल भन्सारमा स्तरोन्नति गरेको हो । तर, नेपालतर्फ त्रिवेणीमा गोदाम र पार्किङ बनिनसकेका कारण यहाँबाट धेरै सामान आयातनिर्यात हुँदैन । साभार: कान्तिपुर