चितवन ।
नेकपा एमालेको अध्यक्षमा केपी शर्मा ओली निर्वाचित भएका छन्। चितवनको सोराहमा भएको १० औं महाधिवेशनमा आज बिहानदेखि अध्यक्षसहित पदाधिकारी र केन्द्रीय सदस्य पदका लागि निर्वाचन भएको थियो।
मतपरिणाम अनुसार ओलीले भीम रावललाई पछि पार्दै दोस्रोपटक अध्यक्ष पदमा निर्वाचित भएका हुन्। ओली विजयी भएको ओपचारिक घोषण भने गरिएको छैन। हाल सेभनस्टारमा बन्द सत्र भइरहेको र त्यहाँ ओली आएपछि मतपरिणाम घोषणा हुने बताइएको छ।
यस्तै, ६ जना उपाध्यक्षका लागि भएको निर्वाचनमा अष्टलक्ष्मी शाक्य लोकप्रिय मत ल्याएर निर्वाचित भएकी छिन्। उनीसँगै विष्णु पौडेल, सुरेन्द्र पाण्डे, सुवास नेम्वाङ, युवराज ज्ञवाली पनि विजयी भएका छन्। माओवादीबाट एमालेमा आएका रामबहादुर थापा बादल पनि उपाध्यक्ष पदमा निर्वाचित भएका छन्।
माधव समूहको समथ छाडेर एमालेमै फर्किएका घनश्याम भुसाल भने निर्वाचनमा पराजित भएका छन्। उपाध्यक्षहरु विजयी भएकाहरुको औपचारिक घोषणा पनि बन्दसत्रमा हुनेछ। बन्दसत्रमा पदाधिकारी सहित ३०१ जना निर्वाचित केन्द्रिय कमिटीको सूची समेत घोषणा हुने बताइएको छ।
ओलीले रावललाई सहमतिमा ल्याउन प्रयास गरेपनि रावलले आफू हार्ने थाहा हुँदाहुँदै पनि निर्वाचनमा लडने बताएका थिए।
