नवलपुर । पूर्वप्रधानमन्त्री एवं नेकपा एमालेका अध्यक्ष केपी ओलीले आफ्नो नेतृत्वको सरकार छँदा सुखी नेपाल बनाउन अनगिन्ती काम गरेको दाबी गर्नुुभएको छ। पूर्वपश्चिम रेलमार्ग निर्माण, कावासोतीमा नमुना जिल्ला सदरमुकाम निर्माणको काम, महेन्द्रराजमार्ग फराकिलो बनाउने काम, त्रिवेणीबाट उत्तरतर्फको बाटो, धौवादी फलामखानीबाट फलाम निकाल्ने काम सुखी नेपालकै निरन्तरताको लागि आफैंले सुरु गरेको ओलीले दाबी गर्नुभयो ।
पूर्वि नवलपरासीको कावासोतीमा स्थित मध्यबिन्दु बहुमुखी क्याम्पसको १६ औं वार्षिकोत्सवको अवसरमा आयोजित कार्यक्रममा ओलीले देश विकासलाई अघि बढाउन एमाले सरकारको पालामा थुप्रै इट्टा थपिएको बताउनुभयो । नेता ओलीले अर्को प्रसंगमा नेपालकै ऋषिमुनिको सिको गर्दै चिकित्सा विज्ञानले बिरामीको शल्यकृयाको सुरुआत भएको समेत जिकिर गर्नुभयो ।
यस क्रममा ओलीले मझीलाल थारुको नाममा २ लाख रुपैयाँको अक्षयकोषको समेत घोषणा गर्नुभएको छ। पूर्वी नवलपरासीका पूर्वसांसद मझीलाल थारु थनैतको नाममा आफूले २ लाखको अक्षयकोष स्थापना गरेको ओलीले घोषणा गर्नुभएको हो । मध्यबिन्दु बहुमुखी क्याम्पसले संचालन गर्ने गरी उक्त अक्षयकोषका लागि आफू काठमाडौं पुगेपछि २ लाख रुपैयाँ पठाइदिने प्रतिबद्धता समेत ब्यक्त गर्नुभयो ।
थारु २०४८ सालपछि नवलपरासीबाट २ पटक सांसद निर्वाचित भइसकेका नेता हुन् । एमाले नेता थारुको योगदानको कदर गर्दै ओलीले आफनो व्यक्तिगत तवरबाट थारुको नाममा २ लाखको अक्षयकोष स्थापना गरेको बनाउनुभयो । २०४८ सालपछि लुम्बिनी अञ्चलमा एमालेबाट निर्वाचित एक्लो सांसदका रुपमा रहेका थारु लुम्बिनी टाइगर नामबाट पनि परिचित छन् ।