देवचुलीमा नवनिर्वाचित नगर प्रमुखकाे पदभार ग्रहण, तीन महत्वपूर्ण निर्णयमा हस्ताक्षर

देवचुली । देवचुली नगरपालिकका नवनिर्वाचित नगर प्रमुख तथा उपप्रमुखले पदभार ग्रहण गरेका छन् । वैशाख ३० गते भएकाे स्थानिय तहकाे निर्वाचनमा निर्वाचित नगर प्रमुख हरिप्रसाद न्याैपाने तथा उपप्रमुख पार्वता तिवारीले पदभार ग्रहण गरेका हुन् ।
शुक्रबार प्रभार ग्रहण गरेसंगै नगरप्रमुख न्याैपानेले भूमिहिन दलित र भूमिहिन सुकुम्बासिहरुलाई प्रचलित कानून बमोजिम जग्गा उपलब्ध गराउनको लागि नगरपालिका कार्यालयको तर्फबाट तत्काल थप जनशक्ति व्यवस्था गरी यथाशक्य छिटो उक्त प्रक्रिया अगाडी बढाउने, नगरपालिका भित्रका विपन्न जेष्ठ नागरिकहरुलाई कार्यविधि बमोजिम वार्षिक दुई पटक ( छ / छ महिनामा ) घर दैलो कार्यक्रम राखी स्वास्थ्य परीक्षण तथा स्वास्थ्य परामर्श सेवा उपलब्ध गराउने गरी स्वास्थ्यकर्मीको व्यवस्था मिलाउने तथा गर्भवती तथा विपन्नताका कारण शल्यक्रियाका बखतमा समेत रगत व्यवस्थापनको कार्यमा रक्त परिक्षण शुल्क वापतको रकम अन्यत्र निकायबाट अनुदान व्यवस्था नभएको अवस्थामा अन्तरप्रदेशमा समेत खर्च हुन आएको रक्त परीक्षण शुल्क वापतको रकम कार्यविधि तयार पारी कार्यविधिमा व्यवस्था भए बमोजिम नगरपालिकाबाट अनुदान स्वरुप उपलब्ध गराउने तीन महत्वपूर्ण निर्णयमा हस्ताक्षर गरेका हुन् ।

पदभार ग्रहण कार्यक्रममा बाेल्दै न्याैपानेले निर्वाचनकाे बेला आफुले गरेकाे प्रतिबद्धता एवं घाेषणा पत्रमा उल्लेख भएका याेजना हरुलाई क्रमिकरुपमा पुरा गर्दै जाने र समृद्ध देवचुली र सुखी नगरबासी बनाउन नवनिर्वाचित जनप्रतिनिधिहरु एकढिक्का भई अगाडि बढ्ने बताएका छन् ।
कार्यक्रममा नगरप्रमुख न्याैपानेले नवनिर्वाचित जनप्रतिनिधिहरुलाई पद तथा गाेपनियताकाे सपथ ग्रहण गराएका थिए ।