काठमाडौं । पहिलो संस्करणको काठमाडौं मेयर्स कप एकदिवसीय क्रिकेट प्रतियोगिताको उपाधि नेपाल पुलिस क्लबले जितेको छ ।
आज फाइनलमा नेपाल एपीएफ क्लबलाई ८ विकेटले हराउँदै पुलिसले उपाधि जितेको हो ।
उपाधिसँगै पुलिसले ट्रफी र नगद ५ लाख रुपैयाँ पाएको छ । त्यस्तै, उपविजेता एपीएफले ३ लाख पाउने हात पारेको छ ।
फाइनलमा एपीएफले दिएको १ सय ६ रनको सामान्य लक्ष्य पुलिसले २४.१ ओभरमा २ विकेट गुमाएर भेट्टायो ।
उसका लागि सुनिल धमलालले अर्धशतकीय पारी खेले । उनले ८२ बलमा ७ चौका र २ छक्कासहित अविजित ५९ रन बनाए ।
त्यस्तै, अनिल साह, कुशल भुर्तेलले १५/१५ र दीपेन्द्रसिंह ऐरीले नटआउट ११ रनको योगदान दिए । बलिङमा अविनाश बोहरा र भुवन कार्कीले एक/एक विकेट हात पारे ।
त्यसअघि, टस जितेर पहिला ब्याटिङ गरेको एपीएफ २९.४ ओभरमै अलआउट भएको हो ।
उसका लागि बसन्त रेग्मीले २२, सन्दीप जोरा, अमरसिंह रौटेलाले १८/१८, भुवन कार्कीले १४ र अविनाश बोहराले १२ रन बनाए । बाँकी ब्याट्सम्यानले भने दोहोरो अंकमा समेत रन जोड्न सकेनन् ।
बलिङमा गुल्शन झा र सागर ढकालले उत्कृष्ट प्रदर्शन गरे । गुल्शनले ७ ओभरमा ३६ रन दिएर ४ विकेट लिए ।
त्यस्तै, सागरले ७.४ ओभरमा २८ रन खर्चेर ४ विकेट हात पारे । ललित राजवंशी र पवन सराफको नाममा एक/एक विकेट रह्यो ।
